Qasym-Jomart Toqaev shahmatshy Meruert Kamalıdenovany FIDE World Cup 2025 jarysyndaǵy jetístígímen qūttyqtady, - dep habarlaıdy Aqshamnews.kz.
Prezıdent Gruzıyanyń Batumı qalasynda ótíp jatqan Álem kubogynyń íríkteu saıysynda belgílí shahmat sheberlerín qapy qaldyrǵan Meruert Kamalıdenovaǵa qūttyqtau jedelhatyn joldady.
"Memleket ózíńíz sıyaqty talapty jastarǵa árqashan qoldau kórsetedí. Elímízde būl ıntellektualdy oıyn túrín jappaı damytu úshín naqty sharalar qolǵa alyndy. Óskeleń ūrpaq ózderíńízge qarap boı túzeıdí. Árbír jeńísteríńíz olardy jígerlendíredí", – dep jazylǵan jedelhatta.
Memleket basshysy sportshyǵa aldaǵy fınaldyq saıystarda sáttílík tíledí.
Eske salaıyq, 19 jastaǵy Meruert Kamalıdenova (2330) 1/32 fınalda sensatsıyalyq jeńíske qol jetkízdí. Ol álem chempıonatynyń fınalısí, 2023 jylǵy Álem kubogynyń jeńímpazy, álemdík deńgeıdegí grossmeıster Aleksandra Goryachkınany sensatsıyalyq túrde jeńdí.