Memleket basshysy "QazMūnaıGaz" ŪK AQ basqarma tóraǵasy Ashat Hasenovtí qabyldady, - dep habarlaıdy aqshamnews.kz tílshísí.
Qasym-Jomart Toqaevqa ūlttyq kompanıyanyń 2025 jyly atqarǵan jūmysy men bıylǵy míndetterí jónínde málímet beríldí.
Ashat Hasenovtíń aıtuynsha, byltyr Qytaıdyń CNOOC jáne Sinopec kompanıyalarymen Atyrau oblysyndaǵy Jylyoı jáne Batys Qazaqstan oblysyndaǵy Berezovskıı jobalary boıynsha jer qoınauyn paıdalanu kelísímsharttary jasaldy. Turkish Petroleum Corporation, BP, Horvat kómírsutegí agenttígí sekíldí írí halyqaralyq kásíporyndar elímízdegí perspektıvtí uchaskelerdí zerttep jatyr.
Prezıdentke "QazMūnaıGaz" kompanıyasy būǵan deıín keń kólemde zerttelmegen jáne jítí kóńíl bólínbegen aumaqtarda geologıyalyq barlau júrgízuge erekshe den qoıǵany jónínde bayandaldy. 2025 jyly 8 ízdeu ūńǵymasyn būrǵylau ayaqtaldy, al 2029 jylǵa deıín taǵy 24 ízdeu ūńǵymasyn būrǵylau josparlanǵan. Jalpy ınvestıtsıya kólemí 900 mıllıon dollardan asady.
Memleket basshysyna ūsynylǵan esepke sáıkes 2025 jyldyń qorytyndysy boıynsha mūnaı men kondensat óndíru kólemí 26,2 mıllıon tonnaǵa jettí. Būl 2024 jylmen salystyrǵanda 10 paıyzǵa joǵary. Būdan bólek, kógíldír otyn óndíru kólemín jylyna qosymsha 2,3 mıllıard tekshe metrge ūlǵaıtu úshín Batys Prorva, Ortalyq Óríktau jáne Rojkov ken oryndarynda jūmys júrgízílíp jatyr.
Byltyr "QazMūnaıGazdyń" úsh mūnaı óńdeu zauytynda 17,5 mıllıon tonna shıkízat óńdeldí. Jeńíl mūnaı ónímderín shyǵaru kólemí - 13,6 mıllıon tonna (2024 jylǵy kórsetkíshten 1,2 mıllıon tonnaǵa artyq).
Sondaı-aq, Qasym-Jomart Toqaev mūnaı-gaz hımıyasy men gaz óńdeu salasyndaǵy jalpy qūny 15 mıllıard dollardan asatyn írí ınvestıtsıyalyq jobalardy íske asyru barysymen tanysty. Mańǵystau oblysynda quaty táulígíne 50 myń tekshe metr bolatyn "Kendírlí" teńíz suyn tūshytu zauyty paıdalanuǵa beríldí.
Kezdesu sońynda Memleket basshysy geologıyalyq barlau jūmystaryn jandandyruǵa jáne írí ınvestıtsıyalyq jobalardy uaqtyly íske asyruǵa qatysty míndet júktedí.