Memleket basshysy Qasym-Jomart Toqaev qazaqstandyqtardy 7 mamyr – Otan qorǵaushy kúnímen qūttyqtady, – dep habarlaıdy aqshamnews.kz tílshísí.
“Qūrmettí otandastar! Barshańyzǵa Otan qorǵaushy kúní qūtty bolsyn! Memlekettík árí qoǵamdyq mańyzy aıryqsha merekede jauyngerlerímízdíń eren erlígí, myqty ruhy men qaıtpas qaısarlyǵy keńínen dárípteledí. Būl – Qazaqstannyń qauípsízdígín, tūraqtylyǵy men tynyshtyǵyn kúndíz-túní qas qaqpaı kúzetken, sondaı-aq qazír Otan aldyndaǵy boryshyn adal ótep jatqan barsha azamatqa qūrmet kórsetíletín kún. El jauyngerlerí men komandırlerí batyr babalarymyzdyń dańqty jolyn jalǵastyryp, naǵyz otanshyldyq ruhynyń jarqyn úlgísín kórsetíp keledí”, – dedí ol.
Sondaı-aq Toqaev sardarlar men sarbazdardyń, barlyq kúshtík qūrylym qyzmetkerleríníń bítímgerlík mıssıyalar, arnauly oqu-jattyǵu jıyndary men túrlí halyqaralyq saıystar kezíndegí kásíbı sheberlígí, temírdeı tártíbí men jauyngerlík dayarlyǵy – sonyń aıqyn dálelí ekenín atap óttí.
“Quatty áskerímíz eń kúrdelí míndetterdí oryndauǵa qashanda daıyn ekení sózsíz. Sondyqtan memleket elímízdíń qorǵanys qabíletín kúsheıtuge jáne áskerı qyzmetshílerdíń áleumettík jaǵdaıyn jaqsartuǵa árdaıym basa mán beredí. Jańa Konstıtutsıyada "Qazaqstan Respublıkasyn qorǵau – onyń ár azamatynyń qasıettí paryzy men míndetí" dep jazyldy. Osy asa mańyzdy tūjyrym memleket pen halyqtyń tyǵyz baılanysyn, el taǵdyryna árbír otandasymyzdyń jauapty ekenín ańǵartady. Bíz Otanǵa qaltqysyz qyzmet etu qaǵıdatyn jáne Konstıtutsıyada aıqyndalǵan myzǵymas qūndylyqtardy negízge ala otyryp, san ǵasyrlyq tarıhy bar memlekettílígímízdíń tūǵyryn nyǵaıta túsemíz, bıík maqsat-mūratymyzǵa jetíp, Ádílettí, Kúshtí, Qauípsíz Qazaqstandy qūramyz. Men būǵan kámíl senemín”, – delíngen qūttyqtauda,
Prezıdent antyna adal bolyp, tabandylyq tanytyp, mínsíz qyzmet etíp júrgen Otan qorǵaushylarymyzǵa alǵys aıtty.
“Barsha azamattarymyzǵa myqty densaulyq, amandyq jáne tabys tíleımín! Armıyamyzdyń aıbyny, halqymyzdyń yntymaǵy arta bersín! Qasterlí Táuelsízdígímízdíń tūǵyry bekem bolsyn!” – dep túıíndedí prezıdent.