Astanada jańadan qūrylǵan «Ádílet» partıyasynyń qūryltaı sezí óttí. Jıynda delegattar būrynǵy Prezıdent Ákímshílígíníń basshysy Aıbek Dadebaıdy partıya tóraǵasy etíp bírauyzdan saılady, – dep habarlaıdy aqshamnews.kz tílshísí.
Sezge elímízdíń barlyq óńírínen 1000-ǵa juyq delegat qatysty. Jıyn barysynda partıyanyń baǵdarlamasy men jarǵysy bekítílíp, sayası keńes qūramy jasaqtaldy.
Partıya ádílettílík, jauapkershílík jáne patrıotızm qūndylyqtaryn basty baǵdar retínde ūstanatynyn málímdedí. Aıbek Dadebaı alǵashqy sózínde «Ádílettíń» negízgí míndetí – azamattardyń zańǵa jáne ádíldíkke degen senímín nyǵaıtu ekenín atap óttí.
Onyń aıtuynsha, būl ūstanymdar Prezıdent Qasym-Jomart Toqaev júrgízíp otyrǵan sayası reformalar baǵytymen úndesedí.
Partıyanyń sayası keńesí byurosyna Aıbek Dadebaımen qatar qoǵam jáne sayasat ókílderí endí. Olardyń qatarynda sayasattanushy Marat Shıbutov, jurnalıst Rauan Kenjehanūly jáne būrynǵy tsıfrlyq damu mınıstrí Baǵdat Musın bar.
Aıta keteıík, Aıbek Dadebaı Prezıdent Ákímshílígíníń basshysy qyzmetín 2024 jyldyń aqpanynan 2026 jyldyń 5 mamyryna deıín atqardy. Keıín būl qyzmetke būrynǵy bírínshí vıtse-premer Roman Sklyar taǵaıyndalǵan bolatyn.
«Ádílet» partıyasy aldaǵy uaqytta ashyqtyq pen eseptílík qaǵıdatyn ūstanyp, naqty máselelerdí sheshuge baǵyttalǵan júıelí jūmys júrgízetínín málímdedí.