Almaty qalasynyń Turızm basqarmasy men qazaqstandyq FlyArystan áue kompanıyasy turıstík áleuettí arttyru jáne sheteldík qonaqtar sanyn kóbeıtu maqsatynda yntymaqtastyq turaly memorandumǵa qol qoıdy, – dep habarlaıdy aqshamnews.kz tílshísí.
Qūjat ayasynda taraptar Almatyny sheteldík naryqtarda bírlesíp nasıhattaudy josparlap otyr. Negízgí baǵyttardyń qatarynda marketıngtík kampanıyalar, aqparattyq jobalar jáne qalanyń halyqaralyq deńgeıdegí tartymdylyǵyn arttyruǵa arnalǵan basqa da bastamalar bar.
Almaty qalasy Turızm basqarmasynyń basshysy Ǵalıya Toqseıítova halyqaralyq áue qatynasynyń damuy turıster sanyna tíkeleı áser etetínín atap óttí. Onyń aıtuynsha, būl Almatynyń Ortalyq Azıyadaǵy jetekshí turıstík baǵyt retíndegí ornyn nyǵaıta túsedí.
«2025 jyly Almatyǵa shamamen 2,5 mıllıon turıst keldí, onyń 754 myńy sheteldík qonaqtar. 2026 jyly būl kórsetkísh 800 myńnan asady dep boljanyp otyr. Qazír qala elímízdegí írí avıatsıyalyq habqa aınalyp keledí: Almaty 60-tan astam halyqaralyq baǵytpen tíkeleı baılanysqan jáne Qazaqstandaǵy halyqaralyq áue tasymalynyń 60 paıyzdan astamyn qamtamasyz etedí. Būl kírme turızmdí damytuǵa úlken múmkíndík beredí», — dedí ol.
Taraptar ūzaq merzímdí seríktestíktí jalǵastyruǵa nıettí. Būl Almatyny Ortalyq Azıyadaǵy qysqa merzímdí jáne bíríktírílgen saparlar úshín qoljetímdí árí tartymdy baǵyt retínde ílgeríletuge, tranzıttík áleuetín arttyruǵa jáne turıster geografıyasyn keńeıtuge baǵyttalǵan.