Almatydaǵy Saıran kóliniń jaǵasynda ótken tazalyq aksıasy qoǵamnyń túrli ókilderin bir arnaǵa toǵystyrdy. Qala tazalyǵyn saqtaýǵa shyqqan jandardyń arasynda QR Eńbek sińirgen qaıratkeri, aktrısa Lıza Serikova, akter Baqyt Týshaev syndy talantty óner ıeleri qorshaǵan ortanyń jaı-kúıine beıjaı qaraýǵa bolmaıtynyn aıtyp, jurtty tazalyqty saqtaýǵa úndedi, dep habarlaıdy Aqshamnews.kz tilshisi.
"Biz sahnada elge oı salýǵa tyrysamyz. Biraq bul joly shynaıy ómirdiń sahnasyndamyz. Tabıǵat – bárimizge ortaq. Saıran sekildi sýly-nýly oryndardy saqtap qalý – ár azamattyń mindeti", – dedi aktrısa Lıza Serikova.
Al teatr jáne kıno akteri Baqyt Týshaev bolsa, tazalyq mádenıeti eń aldymen otbasynan bastalýy tıis degen pikirde:
"Adamnyń mádenıettiligi – onyń qoqysty qaıda tastaǵanynan-aq kórinedi. Tabıǵatqa janashyrlyqty tek sózben emes, naqty áreketpen kórsetýimiz kerek. Bul – urpaq aldyndaǵy jaýapkershilik", – dedi ol.
Akterlerdiń aıtýynsha, mundaı aksıalar kópshilikke oı salyp, tabıǵatty kózdiń qarashyǵyndaı saqtaýǵa sebep bolady. Kól jaǵasyn tazalaýǵa kelgender kúni boıy arnaıy sómkelermen qoqys jınap, Saıranǵa qaıta kórik berýge atsalysty.