Búgín, 23 nauryz – «Nauryznama onkúndígí» ayasyndaǵy «Tazaru kúní». Sonymen qatar, ár aıdyń osy kúní respublıkalyq «Taza Qazaqstan» ekologıyalyq aktsıyasy ótkízílíp keledí. Būl kún tazalyq pen jańaruǵa bastaıtyn Áz-Nauryzben astasyp, auqymdy ekologıyalyq sharalardyń mańyzyn arttyra tústí.
Qala boıynsha ūıymdastyrylǵan eko-sharaǵa «Alatau» dástúrlí óner teatrynyń ūjymy da atsalysyp, tūrǵyndardy tazalyq jūmystaryna yntalandyrdy. Olar jol jıekterín, seruen aımaqtaryn, kógaldar men júrgínshíler joldaryn tazalap, ózderín jyly qabyldaıtyn ónersúıer qauymdy, sondaı-aq barlyq qala tūrǵyndaryn ekologıyalyq sharaǵa belsene qatysuǵa shaqyrdy.
Ónerpazdar úndeuí
Almatylyqtardy senbílíkke shaqyrǵan «Alatau» dástúrlí óner teatrynyń artısí, aktrısa Laura Myrzahmetova qalany taza ūstau – árbír azamattyń míndetí ekenín atap óttí. Ol qala kórkí men tazalyǵy úshín qoǵamdyq oryndardyń, sayabaqtar men seruen aımaqtarynyń tazalyǵy erekshe mańyzdy ekenín jetkízdí. Teatrdyń ánshísí Aısūlu Qaıyrǵazına kóktem – jańaru kezeńí ekenín aıtyp, jūrtshylyqty osy kezde aınalany taza ūstap, kógaldandyruǵa shaqyrdy.
Ónerpaz Narıman Qajymūratūly jyl saıyn senbílíkterge qatysudy dástúrge aınaldyrǵanyn aıtty. Onyń píkírínshe, «Tazalyq – saulyq negízí. Bízge taza álem kerek». Onyń áríptesí Elbol Quanbek qala tazalyǵyna ár azamattyń úlesí mańyzdy ekenín aıtyp, barsha tūrǵyndardy senbílíkke qatysuǵa úndedí.
«Alatau» dástúrlí óner teatrynyń» taǵy bír artısí Ermek Medenov qoǵamdyq sharadan qalys qalmaı, Almatyny taza ūstauǵa atsalysqanyn aıtty. «Almaty – bízdíń ortaq úıímíz» aktsıyasynyń ūrpaq tárbıesíndegí mańyzy zor ekenín atap ótken teatr artısí Erǵalı Aǵaıdarov:
«Tárbıe – tal besíkten bastalatyndyqtan, mūndaı ís-sharalardyń jas buyn úshín orny erekshe», – deıdí.
Óner adamdarynyń píkírí
Bıbígúl Orynbasar, artıst:
«Almaty – bízdíń ortaq úıímíz» aktsıyasy – óte mańyzdy shara. Qazír ekologıyalyq máseleler búkíl álemde ózektí bolyp tūr. Sondyqtan mūndaı senbílíkterdíń paıdasy zor. Árıne, qalany tolyq tazartyp úlgermesek te, óz úlesímízdí qosuǵa tyrysamyz. Sebebí tazalyq – saulyq negízí».
Sattar Erubaev, artıst:
«Tazalyq jūmystaryna jauapty arnaıy mekemeler bar, bíraq būl kópshílíktíń jūmyla kírísuímen ǵana nátıjelí bolmaq. Mūndaı ūjymdyq eńbektí halqymyz «asar» dep ataǵan. Qala tazalyǵyna úles qosu – ár azamattyń paryzy. Būl tek senbílík emes, halyqtyq merekege aınaluy kerek. Eń bastysy – būl keleshek ūrpaqqa ónege. Balalarǵa tazalyqtyń mańyzyn kórsetíp, olardy tabıǵatty ayalauǵa úıretu qajet».
Ońdasyn Besíkbasov, akter:
«Eger tūratyn jerímíz taza bolsa, auamyz da taza bolady. Būl – bízdíń nemere-shóberelerímízdíń densaulyǵy úshín mańyzdy. Mūndaı senbílíkter aı saıyn ūıymdastyrylyp, tūraqty túrde ótkízílíp tūruy kerek dep esepteımín. Bíraq arnaıy ís-sharany kútpeı-aq, ár adam kúndelíktí júrgen jerín taza ūstasa, qalamyz kórkeıe túser edí».
Qala tūrǵyndaryn senbílíkke shaqyru
«Almaty – bízdíń ortaq úıímíz!» ūrany ayasyndaǵy «Tazaru kúní» aktsıyasy qalanyń barlyq audandaryn qamtydy. Sharanyń basty maqsaty – qalany taza ūstau, qala tūrǵyndarynyń ekologıyany qorǵauǵa degen yntasyn arttyru jáne joǵary tazalyq mádenıetín qalyptastyru. Kezektí ekologıyalyq aktsıyaǵa «Alatau» dástúrlí óner teatry ūjymynan ózge de ónerpazdar qatysyp, tūrǵyndardy ıgí íske úles qosuǵa shaqyrdy.
Óktem Altaev, ánshí:
«Almatyda ótíp jatqan ekologıyalyq nauqanǵa qatysyp, erekshe kóteríńkí kóńíl-kúıge bólendím. Nauryz ben Ramazan aıynyń osyndaı sharamen tūspa-tūs keluí erekshe áser syılady. Būl aktsıya joǵary deńgeıde ótíp jatyr. Almatyny súıeıík, taza ūstaıyq! Bízdíń súıíktí qalamyz árdaıym júregímízde!»
Ashat Tarǵyn, ánshí:
«Almaty – bízdíń ortaq úıímíz», sondyqtan ár tūrǵyn onyń tazalyǵyna úles qosuy kerek. Óner adamdary da būl bastamadan qalys qalmaı, qalanyń kórkeyuíne óz úlesterín qosyp jatyr. Senbílíkke shyǵyp, qaǵaz, plastık bótelkeler men ózge de qoqystardy jınaudy ádetke aınaldyrǵanymyz jón. Qala – bárímízge ortaq, sondyqtan tazalyqty árkím ózínen bastauy tıís. Eger ár tūrǵyn tazalyqqa jauapkershílíkpen qarasa, tabıǵatymyz taza, qalamyz ásem árí jaıly bolary sózsíz».