Telavı qalasynda (Gruzıya) Europalyq jastar basketbol lıgasynyń EYBL mausymdyq fınaldyq kezeńí — «Challenge Cup» turnırí óttí, – dep habarlaıdy aqshamnews.kz tílshísí.
Almaty qalasy Sport basqarmasy ókílderíníń málímetínshe, Qazaqstannyń U-15 jasóspírímder qūramasy halyqaralyq dodada sáttí óner kórsetíp, qola júldege ıe boldy. Úshínshí oryn úshín ótken kezdesude qazaqstandyq jas basketbolshylar Gruzıyanyń RUSTAVI komandasyn 89:57 esebímen aıqyn basymdyqpen jeńdí.
Komandanyń būl jetístígíne almatylyq sportshylar da qomaqty úles qosty. Ūlttyq qūrama sapynda «Almatınskıı legıon» klubynyń oıynshylary Lev Gorınskıı, Oljas Adambekov, Erhan Sembaı jáne Arnur Qańtarbaı óner kórsettí.
Turnır qorytyndysy boıynsha eń qūndy oıynshy (MVP) ataǵy almatylyq Oljas Adambekovke būıyrdy. Ol jarys barysynda joǵary sheberlígímen, senímdí oıynymen jáne kóshbasshylyq qasıetímen kózge tústí.
Komanda bas bapker Anastasıya Ovechkınanyń jetekshílígímen ūıymshyl oıyn órnegín kórsetíp, tártíp pen taktıkalyq sauattylyqtyń joǵary deńgeıín pash ettí. Sonyń nátıjesínde jasóspírímder qūramasy halyqaralyq arenada tabysty óner kórsettí.
Sport basqarmasy ókílderíníń aıtuynsha, būl nátıje jasóspírímder qūramasynyń daıyndyǵy joǵary deńgeıde ekenín, al almatylyq basketbolshylardyń oıyny qaladaǵy sport rezervíníń áleuetín aıqyn kórsetkenín dáleldeıdí.