Tarazda jekemenshík mektepte oqıtyn 11 synyp oqushysy sot arqyly jyldar boıy ózímen aralaspaǵan jáne materıaldyq qoldau kórsetpegen ákesínen alıment óndíríp aldy, – dep habarlaıdy aqshamnews.kz tílshísí Joǵarǵy sotqa sílteme jasap.
11-synyp oqushysy aı saıyn 68 myń teńge kólemínde oqu aqysyn tóleıdí.
2008 jyly oqushynyń ákesí ekí balasyna, onyń íshínde osy qyzyna qatysty ata-ana qūqyqtarynan bas tartu turaly aryz jazyp, ony notarıaldy túrde kuálandyrǵan.
2018 jyly qyzdyń anasy men aǵasy qaıtys bolǵan. Qazírgí uaqytta ol ájesímen bírge tūrady jáne tolyqtaı onyń asyrauynda.
Ákesí eshqandaı materıaldyq kómek kórsetpegen, qarym-qatynastan qashqaqtaǵan, al kómek sūraǵan kezde qyzynyń telefon nómírín būǵattap otyrǵan.
Sotqa alıment óndíru turaly talap qoyumen júgíngende, oqushy ózíníń qarjylyq qıyndyqtarǵa tap bolǵanyn kórsetken: oqu men tūrmysqa baılanysty barlyq shyǵyndy ájesí óteıdí. Al qarajat tek azyq-túlík pen eń qajettí qajettílíkterge ǵana jetedí.
Sotta ákesí talapty íshínara qanaǵattandyrudy sūrap, basqa nekeden tuǵan tórt balasynyń bar ekenín jáne nesıelík míndettemelerín alǵa tartqan. Alaıda onyń eńbekke qabílettí ekení jáne bírneshe kásíporynnan tabys tabatyny anyqtalǵan.
Sonymen qatar, sheshím shyǵarylǵan kúní jauapker jeke kásípker retínde tírkeuden shyqqany, al oǵan deıín kóp ūzamaı taǵy tórt balaǵa ákelík qūqyqty resímdegení belgílí bolǵan.
Sot mūny alıment mólsherín jasandy túrde tómendetuge baǵyttalǵan áreket retínde baǵalady.
Taraz qalalyq soty ákeden qyzy mekteptí ayaqtaǵanǵa deıín aı saıyn 17 AEK (66 844 teńge) mólsherínde alıment óndíru turaly sheshím shyǵardy.
Ákesí būl sheshímge apellyatsıyalyq tártíppen shaǵymdanǵan.
Jambyl oblystyq soty bírínshí satydaǵy sot sheshímín ózgeríssíz qaldyrdy.
Sot aktílerí zańdy kúshíne endí.