6 qańtar kúni Almaty oblysynda Almaty-Bishkek tasjolynyń 86-shaqyrymynda jol-kólik oqıǵasy boldy, - dep habarlaıdy Aqshamnews.kz.
Toyota Alphard markaly mınıvendi basqarǵan 33 jastaǵy júrgizýshi kólikti ıgere almaı, joldan shyǵyp aýdarylǵan. Júrgizýshi oqıǵa ornynda kóz jumdy.
Kólikte barlyǵy bes jolaýshy bolǵan. Olardyń tórteýi - Ońtústik Qazaqstan medısına ýnıversıtetiniń stýdentteri, bireýi - týrıs. Olar Shymkentten Almatyǵa bet alǵan.
Almaty oblystyq polısıa departamentiniń málimetinshe, eki jolaýshy - Úndistan azamattary aýrýhanada alǵan jaraqattarynan qaıtys bolǵan. Taǵy úsh adam aýyr halde aýrýhanaǵa jetkizilip, qazir jansaqtaý bóliminde jatyr.
Atalǵan derek boıynsha tergeý júrgizilip jatyr.
Qazaqstandaǵy Úndistan elshiligi stýdentterdiń qaza tapqanyn rastady. Dıplomatıalyq ókildik marqumdardyń otbasylaryna kóńil aıtyp, zardap shekkenderdiń týystarymen baılanysta ekenin jáne qazaqstandyq bılik organdarymen birlesip jumys istep jatqanyn habarlady.
Aıta keteıik, Toyota Alphard markaly kólik jol apatyna alǵash ret túsip otyrǵan joq. Júrgizýshilerdiń jyldamdyqty asyrýy, shamadan tys sharshaýy jáne baqylaýdyń álsizdigi saldarynan bul mınıvender halyq arasynda "ólim kóligi" atanyp ketken.