Ūlttyq at sporty auyl arasyndaǵy oıynnan bara-bara kásíbı ındustrıyaǵa aınalyp keledí. Qalada klubtar ashylyp, jarys ótíp, jastar tehnıka men mádenıettí qatar ūshtastyratyn dástúrlí sportqa kóptep kele bastapty, – dep habarlaıdy aqshamnews.kz tílshísí.
Almaty qalalyq ūlttyq jáne at sporty túrlerí klubynyń jetekshísí Nūrlan Ospanov: «Qazaqstanda ūlttyq at sportynyń 11 túrí bar. Olardyń qatarynda asyq atu, audaryspaq, báıge, teńge ílu, qazaqsha kúres, toǵyzqūmalaq, jamby atu da bar. Almatydaǵy bízdíń klubta sporttyń osy túrímen 1490 sportshy aınalysady qazír. Eń jaqsy damyp jatqan túrlerí — asyq atu, toǵyzqūmalaq pen qazaqsha kúres»,- dep tolyqtyrdy áńgímení.
Būl sportta jastarǵa kóp kóńíl bólgen. Audaryspaq pen teńge ílu boıynsha aǵa jattyqtyrushy Ashat Rysov bylaı deıdí: «Qazír bízdíń prezıdent ūlttyq at sporty túrleríne erekshe kóńíl bólíp jatyr. Bízde bastapqy daıyndyq toby bar, būlar 15–17 jas aralyǵyndaǵy jasóspírímder. Odan keıín 17–21 jastaǵy jastar, 21 jastan asqandary eresekter sanatyna jatady»
Jattyqtyrushynyń aıtuynsha, klubqa kóbíne attyń qūlaǵyndaı oınaıtyn, jastaıynan kókpar tartyp ósken auyldyń balalary keledí eken. Ortalyqta ol balalardy baulyp, sheberlígín odan árí jetíldíre túsuge baryn salady.
Jas shabandozdar úshín at sporty — mádenı bíregeılíktíń bír bólígí. Almaty sportshylary respublıkalyq jáne halyqaralyq arenalarda jetístíkke jetíp, qalada tūryp ta kókpar tartuǵa bolatynyn íspen dáleldep júr.
Audaryspaq sportshysy Dıas Doǵdyrbaı:
«Qazír kóptegen chempıonattar ótíp jatyr, báríne qatysqymyz keledí. Sebebí jarysqa qatysqan saıyn klub ta ósedí, ózíń de jattyǵasyń. Qansha jattyqsań da, eger jarysqa shyqpasań — eshqashan damymaısyń. Sondyqtan bíz kúníne ekí ret jattyǵamyz»,- deıdí.
Almatyda qazír at sportyna qyzyǵatyndardyń sany artyp, klubtar ashylyp, jastar da oǵan kóptep kele bastaǵan. Qala būdan ūlttyq at sportyn damytyp jatqan úlken ortalyqtyń bíríne aınaluy bek múmkín bolashaqta.