Taekvondodan Qazaqstan Chempıonatynyń alǵashqy jeńímpazdary marapattaldy, – dep habarlaıdy aqshamnews.kz tílshísí.
Jasóspírímder arasynda taekvondodan Shyǵys Qazaqstanda jalauyn kótergen Qazaqstan Respublıkasynyń chempıonatynyń alǵashqy úzdík sportshylary saltanatty túrde marapattaldy. Eldíń ár óńírínen kelgen jas sportshylar joǵary daıyndyq deńgeıín kórsetíp, tartysty beldesuler ótkízude.
Jarys 2012-2014 jylǵy jasóspírímder arasynda 20 salmaq boıynsha ūldar jáne qyzdar toby arasynda ótude. Qazaqstannyń jıyrma aımaǵynan jınalǵan 852 jas taekvondoshy bes kún boıy baq synaıdy. Búgín alǵashqy bolyp jasóspírím qyzdar arasyndaǵy 33 kelí salmaq dárejesíníń júldegerlerí marapattaldy. Qūttyqtau rásímíne Shyǵys Qazaqstan oblysynyń ákímí Nūrymbet Saqtaǵanov qatysty.
Atalǵan salmaqta qola júldení Qyzylorda oblysynyń ókílí Ásel Saın men Mańǵystau oblysynan Rayana Jaqsygeldí ıelendí. Kúmís júlde Pavlodar oblysynyń sportshysy Valerıya Kaplyaǵa būıyrsa, altyn medaldí Atyrau oblysynan Aıaru Orynǵalı jeńíp aldy.
Odan keıín jasóspírím ūldar arasyndaǵy 37 kelí salmaq dárejesíníń jeńímpazdary marapattaldy. Qola júldege Almaty qalasynyń sportshylary Alı Pavlıkov pen Abdullın Satybaldy ıe boldy. Shymkent qalasynyń ókílí Qaldarbek Nūrdaulet kúmís júldeger atansa, Jambyl oblysynan Islam Ibragım chempıon atandy.
Marapattau rásímí jasóspírím qyzdar arasyndaǵy 55 kelí salmaq dárejesí boıynsha jalǵasty. Būl salmaqta Mańǵystau oblysynyń sportshysy Arujan Baıysh pen Almaty qalasynyń ókílí Sofıya Uaısova qola júldege ıe boldy. Ūlytau oblysynan Tomırıs Syzdyqova kúmís júlde alsa, Astana qalasynyń sportshysy Sofıya Zıyatdınova altyn medal jeńíp aldy.
Kesh sońynda jasóspírím ūldar arasyndaǵy +65 kelí salmaq dárejesíníń júldegerlerí de marapattaldy. Būl salmaqta qola júldení Qyzylorda oblysynan Elqoja Marat pen Astana qalasynyń sportshysy Danıs Nūrymbetov ıelendí. Al fınalda Almaty qalasynyń taekvondoshylary baq synap, Madıyar Meıírhanov kúmís júldeger atansa, Iskander Dautov chempıon atandy.
– Sońǵy ret 2019 jyly jastar arasynda Shyǵysta ótkízgen bolatynbyz. Endí míne, kadetter arasynda jarys ótíp jatyr. Kelesí jyly osy jylǵy balalar arasynda Álem chempıonaty ótedí. Būl sol dodaǵa daıyndyq retínde íríkteu. Kún saıyn jarys tórt salmaq dárejesí boıynsha ótude. 15 mamyrda qorytyndy jarystar ótedí, – dedí ShQO boıynsha taekvondo federatsıyasynyń prezıdentí Merhat Bolathanūly.
Jarys sońynda ūıymdastyrushylar búgíngí júldegerler men qatysushylardy qūttyqtap, sportshylar estelík suretke tústí. Chempıonat jas sportshylardyń sheberlígín shyńdap, elímízdegí taekvondo sportynyń qarqyndy damyp kele jatqanyn taǵy bír márte dáleldedí.