Elordada Qazaqstannyń «Baıtaq» jasyldar partıyasynyń ūıymdastyruymen «Memlekettílík – būl bılík emes, ūlttyń bolashaǵy úshín jauapkershílík» atty qoǵamdyq-sayası konferentsıya óttí, – dep habarlaıdy aqshamnews.kz tílshísí.
Jıynda sayası reformalar, ūlttyq qauípsízdík, ǵylym, ekologıya jáne ekonomıkalyq basqaru máselelerí keńínen talqylandy. Konferentsıya barysynda qoǵamdaǵy ózektí máselelermen qatar, eldíń bolashaq sayası baǵytyna qatysty mańyzdy ūsynystar da aıtyldy.
Sharanyń basty jańalyǵy – «Baıtaq» partıyasynyń «Ádílet» partıyasyna «Samūryq-Qazyna» qory men ūlttyq kompanıyalardyń qyzmetín baqylauǵa arnalǵan parlamenttík komıssıya qūru boıynsha sayası alyans jasau jóníndegí ūsynysy boldy. Būl bastama sayası sarapshylar tarapynan eldegí partıyaaralyq yqpaldastyqtyń jańa kezeńí retínde baǵalanuda.
Konferentsıyany ashqan partıya tóraǵasy Azamathan Ámírtaev memlekettílík ūǵymynyń tek bılíkpen emes, ūlt aldyndaǵy jauapkershílíkpen ólshenetínín aıtty. Onyń sózínshe, jańa Konstıtutsıyada kórsetílgen bolashaq ūrpaq aldyndaǵy jauapkershílík pen tabıǵatty qorǵau qaǵıdalary Qazaqstannyń ūzaqmerzímdí damu baǵyty boluy tıís.
– Memlekettílík – tek basqaru júıesí emes. Būl – ūlttyń bolashaǵyna jauap beru, tabıǵatty saqtau, ūlttyq baılyqty ádíl paıdalanu jáne halyqtyń múddesín qorǵau, – dedí ol.
Konferentsıya barysynda bírqatar sarapshylar men qoǵam qaıratkerlerí óz píkírlerín ortaǵa saldy. Ūlttyq agrarlyq ǵylymdar akademıyasynyń ókílí Túlep Balǵymbaev azyq-túlík qauípsízdígín ūlttyq qauípsízdíktíń negízgí bólígí retínde qarastyru qajettígín aıtty. Al akademık Meıírbek Moldabekov ǵylym ekonomıkanyń basty qozǵaushy kúshíne aınalmaıynsha, eldíń jahandyq básekege tótep beruí qıyn ekenín jetkízdí.
Tehnologıyalardy kommertsıyalandyru salasynyń mamany Aryn Orsarıev jasandy ıntellekt pen ekologıyalyq tehnologıyalardyń memlekettílíktí nyǵaıtudaǵy rólíne toqtaldy. Onyń aıtuynsha, tehnologıyalyq táuelsízdík pen ınnovatsıyalyq damu Qazaqstan úshín strategıyalyq basymdyqqa aınaluy qajet.
Sondaı-aq, professor Jamaleden Ibragım elde tıímdí sayası reformalar júrgízu úshín kóppartıyaly júıení damytu mańyzdy ekenín atap óttí. Onyń píkírínshe, sayası básekelestík pen qoǵamdyq baqylau kúsheımeıínshe, memlekettík ınstıtuttardyń tıímdílígí de tolyq artpaıdy.
Ekologıya máselesí de nazardan tys qalmady. Nūrgúl Qadyrbaeva óndírístík aımaqtardaǵy ekologıyalyq ahual halyq densaulyǵyna ǵana emes, memlekettíń qorǵanys qabíletíne de áser etetínín aıtty. Ol ekologıyalyq qauípsízdík máselesí memlekettík sayasattyń negízgí baǵyttarynyń bírí boluy kerektígín eskerttí.
Konferentsıyadaǵy eń ózektí bayandamalardyń bírín partıyanyń atqarushy hatshysy Almat Turtaev jasady. Ol «Samūryq-Qazyna» qorynyń qazírgí basqaru modelín synǵa alyp, qordyń bastapqy maqsatynan alystap ketkenín málímdedí.
– Qor búgínde ınvestıtsıyalyq qūrylymnan górí ekonomıkanyń asa írí mınıstrlígíne aınalyp ketken, – dedí Almat Turtaev.
Ol reformanyń bírneshe baǵytyn ūsyndy. Atap aıtqanda, qordy bírneshe táuelsíz qūrylymǵa bólu, menshík ıesí men retteushí funktsıyalaryn ajyratu, ekonomıkadaǵy memleket úlesín azaıtu, halyqaralyq audıt engízu jáne satyp alu júıesín tolyq tsıfrlandyru qajettígín aıtty.
Sonymen qatar, Almat Turtaev «Baıtaq» pen «Ádílet» partıyalary arasynda sayası alyans qūrudy ūsynyp, onyń negízgí maqsaty ūlttyq baılyqty qorǵau jáne «Samūryq-Qazyna» qyzmetíne táuelsíz halyqaralyq audıt júrgízu boluy tıís ekenín jetkízdí. Onyń píkírínshe, parlamenttík deńgeıdegí tūraqty baqylau júıesí memlekettík aktıvterdíń ashyqtyǵyn qamtamasyz etuge múmkíndík beredí.
Sayası sarapshylardyń baǵalauynsha, būl bastama Qazaqstandaǵy partıyaaralyq yqpaldastyqtyń jańa formatyna jol ashuy múmkín. Eger ūsynys naqty sayası kelísímge ūlassa, ol parlamenttík baqylaudy kúsheıtíp qana qoımaı, ūlttyq kompanıyalardyń qyzmetíne qoǵamdyq nazardy arttyruy yqtımal.
Jalpy, konferentsıya «Baıtaq» partıyasynyń aldaǵy parlamenttík saılau aldyndaǵy sayası-ekonomıkalyq ūstanymdaryn aıqyndaǵan mańyzdy alańdardyń bíríne aınaldy. Jıynda kóterílgen máseleler qoǵamdaǵy ekonomıkalyq ádílettílík, sayası jańǵyru jáne ūlttyq jauapkershílík taqyryptarynyń ózektílígín taǵy bír márte kórsettí.