Ata-anasy ūldaryna Omar, Mıras jáne Múslím dep at qoıdy, dep habarlaıdy aqshamnews.kz tílshísí.
2026 jyldyń basynan berí Almatyda 603 egíz jáne alty úshem dúnıege keldí. Solardyń bírí - juyrda №2 qalalyq perınataldyq ortalyqta dúnıege kelgen úsh ūl. Būl turaly Almaty qalasy densaulyq saqtau basqarmasynyń ókílderí aıtty.
27 jastaǵy almatylyq kelínshek bírden úsh ūldyń anasy atandy. Osylaısha, otbasyndaǵy ūldardyń sany tórtke jettí. Úshemderdíń tórt jastaǵy aǵasy bar.
Júktílík trıhorıaldy trıamnıotıkalyq túrde ótken. Yaǵn, ár sábıdíń jeke platsentasy men ūryq qaby bolyp, úsheuí bír-bírínen bólek damyǵan. Sábıler kesar tílígí arqyly dúnıege keldí.
Nárestelerdíń salmaǵy 1740 gramnan 1978 gramǵa deıín, al boıy 34-37 santımetr aralyǵynda boldy. Ata-anasy ūldaryna Omar, Mıras jáne Múslím dep at qoıdy.
Dúnıege kelgennen keıín sábılerdíń bíríne alǵashqy kúnderí qarqyndy respıratorlyq qoldau qajet boldy. Ol ekí kún boıy ókpení jasandy jeldetu apparatyna qosyldy. Qazír úsh náreste de SIPAP-terapıya alyp jatyr jáne dárígerlerdíń tūraqty baqylauynda. Mamandar olardyń jaǵdaıynda oń dınamıka baıqalyp otyrǵanyn atap óttí.
Úshemderdíń anasy ūldaryn alǵash kórgen sát erekshe tolqynysqa toly bolǵanyn aıtady.
«Balalarymdy alǵash kórgende qatty uaıymdap, jylap jíberdím. Óıtkení olar óte kíshkentaı árí álsíz kóríndí. Bíraq ortalyq qyzmetkerlerí maǵan úlken qoldau kórsettí. Olar medıtsınalyq kómekpen qatar, psıhologıyalyq tūrǵydan da demeu boldy. Dárígerler men ortalyqtyń barlyq qyzmetkeríne qamqorlyǵy, yqylasy jáne qoldauy úshín shyn júrekten alǵys aıtamyn», – dedí ol.
Sábıler №2 qalalyq perınataldyq ortalyq mamandarynyń tūraqty baqylauynda.