27 qyrkúıekte 60-tan astam elden kelgen 16 myń júgírushí 15-shí Almaty Marathon jarysyna shyǵady, – dep habarlaıdy aqshamnews.kz tílshísí.
Ís-shara qarsańynda ūıymdastyrushylar jańa baǵyt pen mereıtoılyq jarysqa daıyndyq barysy turaly Óńírlík kommunıkatsıyalar qyzmetíníń alańynda aıtyp berdí. Zertteu baǵalauynsha, 2026 jyly júgíru ís-sharalarynyń Almaty ekonomıkasyna qosqan úlesí qazírdíń ózínde 15,6 mlrd teńgege jetken.
Almaty Marathon-nyń 15 jyldyǵyna oraı 2018 jyldan berí alǵash ret barlyq qashyqtyqtyń baǵyttary tolyq jańartyldy. 42,2 km marafon qalanyń ortalyǵy men tarıhı bólígín qamtıtyn bír aınalymnan tūrady. Sóre Abaı alańynda, al máre Respublıka alańynda ornalasady. Baǵyttar World Athletics talaptaryna sáıkes ólsheníp, sertıfıkattalǵan.
Baǵdarlamada marafon, jartylaı marafon, 10 km júgíru jáne skandınavıyalyq júrís, sondaı-aq komandalyq Ekıden estafetasy bar. Sonymen qatar 42,2 km jáne 10 km qashyqtyqtarda Qazaqstan Respublıkasynyń chempıonaty ótedí.
Bıyl jarysqa 1 500-den astam sheteldík júgírushí qatysady. Qatysushylar arasynda Reseı, Qyrǵyzstan, Qytaı, Ózbekstan, Ūlybrıtanıya, Germanıya, Belarus jáne AQSh azamattary basym.
«Bírínshí bolu – batyldyq» qorynyń Almatydaǵy 2026 jylǵy júgíru jarystarynyń jıyntyq ekonomıkalyq áserí qazírdíń ózínde 15,6 mlrd teńgege jettí. Onyń shamamen 3 mlrd teńgesí salyq túrínde byudjetke tústí – būl qaladaǵy turızm salasynan túsken barlyq salyq túsímderíníń 3,3%-yn qūraıdy. Mausym álí jalǵasyp jatqandyqtan, qorytyndy kórsetkíshter būdan da joǵary bolady.
Esepke ūıymdastyrushylardyń, qatysushylardyń jáne olarmen bírge kelgen tuystary men dostarynyń shyǵyndary, sondaı-aq osy qarajattyń basqa salalarda qalyptastyratyn qosymsha aınalymy engízíldí. Zertteu baǵalauynsha, ár qatysushyǵa orta eseppen 1,6 eríp júrushíden keledí.
Almatydan tys jerlerden kelgen jáne sheteldík júgírushíler qatysushylardyń 21%-yn qūraǵanymen, barlyq shyǵynnyń 73%-yn qūrady. Olar eríp júrushílerímen bírge Almaty ekonomıkasyna 5,3 mlrd teńge ákeldí. Eríp júrushílerín qosa eseptegende, bír sheteldík qatysushynyń ekonomıkalyq áserí orta eseppen 1,82 mln teńgení qūrady – būl jergílíktí júgírushíden túsetín kórsetkíshten 16 ese joǵary.
Saualnamaǵa qatysqan sheteldíkterdíń 64%-y úshín jarys Almatyǵa keludegí negízgí maqsat bolsa, taǵy 16%-y úshín sapar maqsattarynyń bírí bolǵan. Olardyń jartysyna juyǵy qalada alty jáne odan da kóp kún bolǵan, al 87%-y Almatyǵa qaıta keludí josparlap otyr.
Eń kóp qarajat ornalastyru salasyna túsken – 3,7 mlrd teńge. Bólshek saudaǵa 1,2 mlrd teńge, kólík salasyna 1 mlrd teńge, oıyn-sauyq salasyna 900 mln teńge, qoǵamdyq tamaqtanu salasyna 800 mln teńge tıesílí. Jalpy ekonomıkalyq áserdíń tórtten bíríne juyǵyn sportpen tíkeleı baılanysty emes salalar, sonyń íshínde azyq-túlík óndírísí, auyl sharuashylyǵy, qūrylys jáne qarjylyq qyzmetter qalyptastyrdy.
«Almaty Marathon áldeqashan bír kúndík ís-sharadan áldeqaıda auqymdy jobaǵa aınaldy. Qatysushylarmen bírge qalaǵa olardyń otbasy men dostary da keledí. Olar mūnda bírneshe kún ayaldap, qonaq úıler men kólík qyzmetterín paıdalanady, meıramhanalarǵa, dúkender men kóríktí jerlerge barady. Sheteldík júgírushílerdíń basym bólígí Almatyǵa qaıta kelgísí keletíní de mańyzdy. Osylaısha marafon Almatyny jańa audıtorıyaǵa tanystyryp, qala ekonomıkasyn qoldauǵa yqpal etedí», – dedí «Bírínshí bolu – batyldyq» korporatıvtík qorynyń atqarushy dırektory Saltanat Qazybaeva.
Mereıtoılyq jarystyń halyqaralyq qatysushylarynyń qatarynda 2018 jylǵy Boston marafonynyń jeńímpazy, japondyq marafonshy Yukı Kavauchı bar. Ol Qazaqstan men Ortalyq Azıyaǵa alǵash ret kelíp, jarysqa ózí de qatysady. Onyń sapary Daikin kompanıyasynyń qoldauymen júzege asady.
10 km qashyqtyqqa qatysushylardyń bírínshí legí saǵat 06:00-de, ekínshí legí 06:15-te sóre alady. Marafon saǵat 07:30-da, al jartylaı marafon 07:45-te bastalady.
Qalalyq jáne jedel qyzmetterdíń jūmysyn Ís-sharalardy basqarudyń bíryńǵaı ortalyǵy úılestíredí. Baǵyt boıynda jetí medıtsınalyq shatyr, al márede ekí shatyrly gospıtal ornalasady. 12 jedel járdem brıgadasy, 16 velomedık, 84 medıtsınalyq eríktí jáne túrlí baǵyttaǵy 40 dáríger kezekshílík etedí. Ís-sharany ūıymdastyruǵa 1 500-den astam eríktí qatysady.
Qaıyrymdylyq Almaty Marathon-nyń alǵashqy jarystan berí ajyramas bólígí bolyp keledí. 15 jyl íshínde «Bírínshí bolu – batyldyq» qory jalpy somasy 500 mln teńgeden asatyn 30-dan astam jobany júzege asyrdy. Qarajat sport alańdaryn saluǵa, sensorlyq bólmeler men emdík dene shynyqtyru zaldaryn ashuǵa, sondaı-aq ońaltu jáne medıtsınalyq jabdyqtar satyp aluǵa baǵyttaldy.