Qazaqstan Respublıkasynyń Táuelsízdígíne 35 jyl toluyna oraı «Táuelsízdíktíń 35 jyldyǵy» atty arnaıy telejoba qolǵa alyndy. Eldíń egemendík jolyndaǵy jetístígín dáríptep, azattyqtyń qadírín keıíngí buynǵa jetkízudí maqsat etken túsírílím toby tarıhı oryndardy aralap, el táuelsízdígíníń mán-mańyzyn aıshyqtaıtyn taǵylymdy kezdesuler ótkízude.
Telejoba saparynyń kezektí ayaldamasy – Almatydaǵy Táuelsízdík monumentí men «Táuelsízdík tańy» eskertkíshí boldy. Túsírílím toby el tarıhyndaǵy mańyzdy nysanǵa taǵzym etíp, azattyqtyń aıshyqty sımvoly sanalatyn monument turaly syr tarqatty.
Qalanyń qaq tórínde ornalasqan monument 1996 jyly Qazaqstan Táuelsízdígíníń 5 jyldyǵyna oraı ashylǵan. Bıíktígí 28 metrlík stellanyń ūshar basynda qanatty barysty tízgíndegen «Altyn adam» beınesí boı kótergen. Būl – eldíń erkíndígí, aıbarly ruhy men berík memlekettílígín beıneleıtín sáulettík nyshan.
Telejobanyń negízgí maqsaty – Táuelsízdíktíń tarıhı mańyzyn nasıhattap qana qoımaı, onyń qadírín jas ūrpaqtyń sanasyna síńíru.
«Táuelsízdíkke 35 jyl» atty jobamyzdy Shymkent qalasynan bastap, jolǵa shyqtyq. Joba ayasynda úsh megapolıs pen toǵyz oblys ortalyǵyn qamtudy josparlap otyrmyz. Saparymyz shamamen ekí aptaǵa sozylady. Shymkenttegí Táuelsízdík sayabaǵynan jolǵa shyqtyq. «Túlkíbas» stantsıyasynda Mūhamedjan Tynyshbaev men Tūrar Rysqūlovtyń dostyǵyna arnalǵan eskertkíshke gúl shoqtaryn qoıdyq. Endí Almatyǵa kelíp, Táuelsízdík monumentíne taǵzym ettík, – dedí Túrkístan oblystyq máslıhatynyń deputaty, «Aıǵaq» teleradıokompanıyasynyń bas dırektory Dulat Ábísh.
Onyń aıtuynsha, joba barysynda eldíń ótkení men búgíní, táuelsízdík jyldaryndaǵy tarıhı belester men qoǵamdyq qūndylyqtar sóz bolady. Telejoba «Aıǵaq» telearnasy arqyly Túrkístan oblysy men Shymkent qalasynda kórsetílíp, áleumettík jelílerde de jarıyalanady.
– Táuelsízdíktí ár adam ártúrlí túsínedí. Bírí onyń qadírín tereń sezínse, endí bírí būl ūǵymnyń máníne boılaı bermeuí múmkín. Sondyqtan óskeleń ūrpaqty otansúıgíshtíkke tárbıeleu mańyzdy. Bízdíń telejobanyń negízgí maqsatynyń bírí de – osy, – dedí Dulat Ábísh.
Al el tarıhyn keıíngí ūrpaqqa jetkízu ísínde tarıhı tūlǵalardyń taǵylymy aıryqsha oryn alady. Telejoba barysynda kórnektí memleket jáne qoǵam qaıratkerí, qazaqtan shyqqan tūńǵysh temírjol ınjenerí Mūhamedjan Tynyshbaevtyń esímí de keńínen dárípteldí.
Mūhamedjan Tynyshbaevtyń nemere jıení, «M.Tynyshbaev atyndaǵy» qoǵamdyq qordyń prezıdentí Nūrsháken Júnísova el táuelsízdígíníń bayandy boluyna tílek bíldírdí.
– Memlekettík sayasatqa saı elímíz órkendep, óse bersín! Elímízdíń egemendígí berík bolyp, kók tuymyz jelbíreuín toqtatpasyn. Osyndaı quanyshty kúnge jetkenímízge quanyshtymyz, – dedí Nūrsháken Júnísova.
Azattyqtyń aq tańy atqan 1991 jyldan berí Qazaqstan talaı belestí artqa tastady. Táuelsízdík jylnamasy – eldíń qalyptasu tarıhy ǵana emes, ár azamattyń taǵdyrymen sabaqtas qūndylyq. Sondyqtan ony dárípteu, tarıhyn bílu jáne keıíngí buynǵa amanattau – barshaǵa ortaq míndet.
Al Almaty tóríndegí Táuelsízdík monumentí – osy tarıhı joldy eske salatyn únsíz shejíre. Onyń bıígíndegí «Altyn adam» beınesí ūlttyń ótkenín ūlyqtap qana qoımaı, erkín eldíń bolashaǵyna degen senímníń sımvolyndaı áser qaldyrady.
Dana SADYRQAN