Qoǵamda jıí kezdesetín, bíraq qūqyqtyq saldary auyr áreketterdíń bírí — sotta jalǵan kuálík beru. Būl turaly zańger Quat Auǵanbek píkír bíldíríp, mūndaı árekettíń saldaryna jūrttyń nazaryn audardy. Tolyǵyraq Aqshamnews.kz tílshísíníń materıalynda.
"Jalǵan kuálík beru — qylmys"
Zańgerdíń aıtuynsha, sot tergeuí barysynda shyndyqqa janaspaıtyn, ótírík aqparat beru — Qazaqstan Respublıkasynyń Qylmystyq kodeksínde naqty jazalanatyn áreket.
"QR QK-níń 419-baby boıynsha, qylmystyq ístí tergeu nemese sot talqylauy kezínde jalǵan kuálík bergen adam 2000 aılyq eseptík kórsetkíshke deıíngí mólsherde aıyppūl tóleıdí nemese túzetu jūmystaryna tartylady. Keı jaǵdaıda bas bostandyǵynan aıyru jazasy da qarastyrylady. Eger jalǵan kuálík auyr nemese asa auyr qylmysty jasyru úshín berílse, onda jaza típtí qatayady", – deıdí Quat Auǵanbek.
Kuá bolu — qūqyq qana emes, jauapkershílík
Zańger jalǵan kuálík berudíń adam taǵdyryn būzuy múmkín ekenín eske salyp otyr. Onyń aıtuynsha, shyndyqty būrmalau ádílettílíkke kerí áser etedí.
"Árbír azamat sotqa shaqyrylyp, kuá retínde jauap bergende, tek shyndyqty aıtuǵa míndettí. Būl moraldyq jáne qūqyqtyq jauapkershílík. Sebebí jalǵan kuálík bíreudíń taǵdyryn ózgertíp jíberuí múmkín. Kínásíz adam jazaǵa tartylyp, al qylmysker jauapkershílíkten jaltaryp ketuí yqtımal", – deıdí zańger.
Keıbír jaǵdaılar jazadan bosatuy múmkín
Sonymen qatar Quat Auǵanbek zańda jalǵan kuálík úshín keıbír erekshe jaǵdaılarda adamdy qylmystyq jauapkershílíkten bosatuǵa múmkíndík bar ekenín de aıtty.
"Eger adam jalǵan kuálík bergen soń, būl árekettí óz erkímen áshkerelep, shyndyqty aıtsa, sot onyń áreketín jeńíldetetín jaǵdaı retínde qaraı alady. Būl — zańda kózdelgen múmkíndík", – dedí ol.