Shymkent qalasynda erekshe bílím beru qajettílígí bar balalarǵa arnalǵan zamanauı jataqhana paıdalanuǵa beríldí. Nysan zańsyz shyǵarylǵan aktıvterdí qaıtarudan túsken qarjy esebínen salynǵan, dep habarlaıdy Aqshamnews.kz tílshísí.
Shymkentte medıtsınalyq kórsetkíshterí boıynsha erekshe bílím beru qajettílígí bar balalar oqıtyn mektep-ınternat tárbıelenushíleríne arnalǵan jańa jataqhana ashyldy. Būl turaly Bas prokuror Berík Asylov málímdedí.
Onyń aıtuynsha, būǵan deıín tárbıelenushílerdíń jaǵdaıy kúrdelí bolǵan. 1975 jyly salynǵan eskí ǵımaratta oryn tapshylyǵy qatty sezílgen. Normatıv boıynsha 125 orynǵa eseptelgen nysanda 290 bala tūrǵan. Sonymen qatar ınfraqūrylym da ábden tozǵan.
Jańa jataqhana 300 orynǵa arnalǵan. Jalpy audany 8288,70 sharshy metrdí qūraıtyn ǵımarat tolyqtaı zamanauı talaptarǵa saı salynǵan. 3,5 gektar aumaqta ornalasqan nysan aumaǵynda 800 sharshy metrlík futbol alańy, vorkaut aımaǵy, 450 sharshy metrlík oıyn alańdary jáne 200 sharshy metrlík demalys oryndary qarastyrylǵan.
Ǵımarat íshínde ūldar men qyzdarǵa arnalǵan bólek tūrǵyn bloktar, jabdyqtalǵan medıtsınalyq bólím, keń oıyn bólmelerí jáne balalarǵa qolaıly, qauípsíz árí damytushy orta qalyptastyruǵa arnalǵan ózge de bólmeler bar.
Berík Asylovtyń málímetínshe, būl jobaǵa Memleket basshysynyń tapsyrmasy boıynsha Arnauly memlekettík qordan 2,6 mlrd teńge bólíngen. Atalǵan qorǵa zańsyz shyǵarylǵan aktıvterdí qaıtaru jáne qaıtarylǵan múlíktí satudan túsken qarajat jınaqtalady.
Sondaı-aq Bas prokuratura qaıtarylǵan qarajat esebínen eldí mekenderdíń ınfraqūrylymyn damytu jūmystary búkíl el boıynsha jalǵasyp jatqanyn atap óttí. Búgínde shamamen 500 mlrd teńgege 440 áleumettík jáne kommunaldyq nysannyń qūrylysy qarjylandyrylǵan. Onyń 319-y paıdalanuǵa berílgen. Olardyń qatarynda mektepter, auruhanalar jáne sumen jabdyqtau júıelerí bar.
Berík Asylov qaıtarylǵan árbír teńge Qazaqstan azamattarynyń ıgílígíne qyzmet etuí tıís ekenín atap óttí.