7 mamyr – shekara qyzmetíníń sapyna alynǵan jas shekarashylar úshín máńgí este qalatyn kún. Sebebí, dál búgín, Otan qorǵaushylar kúní Almaty qalasyndaǵy QR Ūlttyq qauípsízdík komıtetí Shekara qyzmetíníń Tehnıkany jáne qaru-jaraqty jóndeu basqarmasynda 100 sarbaz Otanyna adal qyzmet etuge saltanatty túrde ant berdí, – dep habarlaıdy aqshamnews.kz tílshísí.
Atalǵan rásímge Jetísu audanynyń ákímí Lázzat Jylqybaeva, basqarmanyń basshylyq qūramy, Shekara qyzmetíníń ardagerlerí, ant qabyldaǵan sarbazdardyń ata-analary men tuystary qatysty.
Otan aldyndaǵy boryshyn el shebínde óteudí tańdaǵan Farhat Beríkūly ant qabyldaǵannan keıíngí áserín bólístí.
«Bıyl sáuír aıynda Aqtóbe oblysynan osy basqarmaǵa shaqyrtyldym. Búgín bíz úshín erekshe kún, azdap tolqyp tūrmyn. Óıtkení, áskerı ant – ekí-aq sózden tūrsa da, mání tereń ūǵym. Onyń ústíne, dál Otan qorǵaushylar kúní Otan aldynda ant bergeníme óte quanyshtymyn. Antty ár adam úlken jauapkershílíkpen qabyldauy kerek. Ózímníń bólímshem jaıly aıta ketsem, bízde tártíp pen jauapkershílík árdaıym bírínshí orynda tūrady», – dedí shekarashy.
«Zastava tarlandary» respublıkalyq qoǵamdyq bírlestígí ardagerler keńesíníń múshesí, otstavkadaǵy polkovnık Erlan Serkebaev ta jas sarbazdarǵa qoldau bíldíru úshín arnaıy kelgen.
«Áskerı ant – er azamattyń ómíríndegí eń mańyzdy árí jauapty sátterdíń bírí. Antty adam ómírínde bír-aq ret qabyldaıdy. Ol – ūzaq jyl arhıvte saqtalatyn tarıhı qūjat. Bíz 40 jylǵa juyq áskerı qyzmette boldyq, egemendík alǵannan keıín Qazaqstan Qaruly kúshteríníń qūryluyna úlesímízdí qostyq. Jas sarbazdarymyz antyna berík bolyp, elge adal qyzmet etedí dep senemín. Otan qorǵau jolynda aman-esen qyzmetterín atqaryp, tuǵan jerleríne abyroımen oralsyn», – dep batasyn berdí ardager.
Jas shekarashylardyń ant qabyldau rásímíne elímízdíń ár túkpírínen arnaıy kelgen ata-analar da qobaljyp júr. Olar úshín balasynyń áskerı boryshyn abyroımen ótegení mańyzdy.
Balasynyń ant bergeníne kuá bolǵan Jambyl oblysy Jualy audanynan kelgen Seıtjappar Búıenbaev būl kúní árbír ata-ana úshín tolyqynysqa toly ekenín aıtty.
«Áskerı bólímdegí serjanttyq jáne ofıtserlík qūramǵa qūrmetím sheksíz. Al ata-analarǵa aıtarym, balalarymyzdy balabaqshaǵa ákelíp otyrǵan joqpyz. Olar endí ózíne jauap bere alatyn, Otan aldyndaǵy jauapkershílíktí sezínetín jasta. Búgín áskerı ant qabyldau arqyly elge adal qyzmet etuge sert beríp otyr. Eń bastysy – abyroı», – dedí ata-ana.
Gúljanat Sembaeva