2026 jylǵy 1 shíldeden bastap Qazaqstanda elektrosamokat pen kıksherıng qyzmetíne qatysty jańa erejeler kúshíne enedí. Jańa talaptarǵa sáıkes, samokatty tek 18 jastan asqan jáne júrgízushí kuálígí bar azamattar ǵana paıdalana alady, dep habarlaıdy Aqshamnews.kz tílshísí.
Almaty qalalyq polıtsıya departamentíníń resmı ókílí Saltanat Ázírbektíń aıtuynsha, shíldeden bastap elektrosamokat tolyqqandy kólík qūraly retínde tanylady. Osyǵan baılanysty kıksherıng kompanıyalary men qoldanushylarǵa qoıylatyn talaptar da kúsheımek.
Jańa zańǵa sáıkes, samokatty jalǵa beru kámeletke tolmaǵandarǵa, júrgízushí kuálígí joq azamattarǵa jáne kólík júrgízu qūqyǵynan aıyrylǵan tūlǵalarǵa tyıym salynady.
Sonymen qatar, barlyq jaldamaly elektrosamokattarǵa memlekettík nómír ornatylady. Būl qūqyqbūzushylyqtardy tírkep, qūrylǵyny sáıkestendíruge múmkíndík beredí.
Kıksherıng kompanıyalary:
– samokattardyń tehnıkalyq jaǵdaıyn baqylauǵa;
– paıdalanushynyń jeke basyn jáne júrgízushí kuálígín tekseruge;
– míndettí saqtandyru rásímdeuge;
– tūraq oryndaryn retteuge;
– jyldamdyq pen qozǵalysty tsıfrlyq baqylau júıesí arqyly qadaǵalauǵa míndetteledí.
Jańa ózgerísterdíń eń mańyzdy tūstarynyń bírí – trotuarda júruge qatysty. Qazírgí erejede samokatpen trotuarda saǵatyna 6 shaqyrymnan aspaıtyn jyldamdyqpen júruge rūqsat etílse, jańa túzetulerde būl norma alynyp tastalmaq.
Eger ózgeríster qabyldansa, elektrosamokattar tek:
– velojolaqpen;
– jol jıegímen;
– joldyń oń jaq shetímen qozǵala alady.
Al arnaıy belgílengen ortaq qozǵalys aımaqtarynda ǵana jayau júrgínshílermen bírge júruge rūqsat beríledí.
Sondaı-aq, samokatpen jolǵa qorǵanys qūraldarynsyz shyǵu, saqtandyrusyz júru sıyaqty áreketter úshín ákímshílík jauapkershílík qarastyrylǵan.
Polıtsıya ókílderíníń aıtuynsha, būl ózgerísterdíń maqsaty – elektrosamokattardy tolyq tyıym salu emes, joldaǵy qauípsízdíktí kúsheıtu.