Úńgírler qauípsízdíktí qamtamasyz etu úshín qajet
Mamandardyń aıtuynsha, Sharyn shatqalynda qauípsízdíktí saqtau úshín úńgírler ornatu qajet. Ázírge qauípsízdík úńgírshelerí úsh jerden qoıylǵan, dep habarlaıdy Almaty-akshamy.kz
Qajettílík tuyndap jatsa, keıín taǵy kóbeıtíledí. Esteríńízde bolsa, bıyl 29 mamyrda seldíń kesírínen ekí adam qaza tapqan bolatyn. Bír búldírshín ertesíne tabylǵan edí. Ūlttyq parkte ekologıyalyq turızmdí damytudyń 2022 – 2025 jyldarǵa arnalǵan tūjyrymdamasy jasaldy.
Aldaǵy bírneshe jylda Sharyndy damytuǵa ınvestorlar 3 mıllıard teńge saludy josparlap otyr. Parktíń ūsynysymen, ınvestorlardyń qoldauymen ınfraqūrylym máselesí sheshíledí.
«Tūjyrymdamada ınfraqūrylymdy damytu máselesí kórsetílgen. Ol jerde glempıng, sapar ortalyǵy, qonaqúı, kempıng, meıramhana sıyaqty turısterdíń demaluyna jaǵdaı jasaıtyn ınfraqūrylymdar salynady», - deıdí "Sharyn" memlekettík ūlttyq tabıǵı parkíníń bólím basshysy Qūtlyqjan Júsípov.
Sharyndy tamashalaushylardyń sany jyldan-jylǵa artyp keledí. 10 jyl būryn mūnda jylyna 1300 adam kelgen bolsa, bıyl toǵyz aıda sayahatshylardyń sany 33 myńnan asypty. Nátıjesínde, aumaqtyń turıstík áleuetí de edáuír jaqsarǵan. Sharyn memlekettík ūlttyq tabıǵı parkíníń negízgí bólígín januarlar álemí qūraıdy. Mūnda sútqorektílerdíń 34 túrí, bauyrymen jorǵalaushylar, qosmekendíler men qūstardyń aluan túrí mekendeıdí. Olardyń arasynda Qyzyl kítapqa engen qaraqūıryq, Síbír tau eshkísí, sabanshy, síleusín jáne Ortalyq Azıya qūndyzy bar. Zańsyz ań aulaushylarmen de kúres kúsheıedí.
«2019 jylǵy derek boıynsha, osy aumaqta qaraqūıryq jabaıy januaryn atqany úshín bír azamat ūstalyp, aıyppūl tólegen. Bír qaraqūıryqqa sol kezdegí AEK-pen eseptegende 9 mıllıon 90 myń teńge aıyppūl salynǵan»,- deıdí Sharyn memlekettík ūlttyq tabıǵı parkíníń bólím basshysy Ársen Nūrǵalıev.
Tabıǵı park aumaǵynda Sharyn shatqalynan ózge taǵy da úsh turıstík baǵyt bar. Olar: Sharyn eren toǵaıy, beıítter men qorǵandar jáne Temírlík kíshí shatqaly. Park mamandarynyń aıtuynsha, Sharyn bír jylda 200 myńǵa juyq turıstí qabyldauǵa qauqarly.
