Abaı oblysy boıynsha Qarjy monıtorıngí agenttígíníń departamentí oblys prokuraturasynyń úılestíruímen jáne Semeı qalasynyń Memlekettík kíríster departamentímen bírlesíp, zańsyz alkogol ónímderín óndírgen jasyryn tsehtyń jūmysyn toqtatty, – dep habarlaıdy aqshamnews.kz tílshísí.
Tergeu málímetínshe, Semeı qalasynyń tūrǵyny tıístí lıtsenzıyasyz alkogol óndírgen. Zańsyz óním orynjaılar men garajdarda spırttí sumen aralastyru arqyly daıyndalyp, keıín tanymal brendterdíń atauymen shyny bótelkelerge qūıylǵan. Ónímge zańdy sıpat beru úshín qoldan jasalǵan esepke alu-baqylau markalary paıdalanylǵan.
Tíntu kezínde "Finsky Ice" jáne "Sıbırskıe morozy" atauymen 12 myńnan astam bótelke alkogol, 8 myńnan asa bos bótelke, 10 myń lıtrden astam spırt qūramdy sūıyqtyq, jalǵan markalar, sondaı-aq óndíru jáne buyp-túyuge arnalǵan jabdyqtar tárkílendí.
Sot sanktsıyasymen tseh ornalasqan jekemenshík úıge jáne ónímdí tasymaldauǵa paıdalanylǵan úsh avtokólíkke tyıym salyndy. Al ūıymdastyrushyǵa qatysty elden shyqpau jáne tıístí mínez-qūlyq turaly qolhat túríndegí būltartpau sharasy tańdaldy.
Qazír tergeu jalǵasyp jatyr. Qazaqstan Respublıkasy QPK-níń 201-babyna sáıkes ózge aqparat jarıya etílmeıdí.
Qarjy monıtorıngí agenttígí mūndaı ónímderdí tūtynu azamattardyń ómírí men densaulyǵyna aıtarlyqtaı qauíp tóndíretínín eskerttí. Vedomstvonyń málímetínshe, sapasyz alkogol ulanuǵa, íshkí aǵzalardyń, sonyń íshínde bauyr men búırektíń zaqymdanuyna, típtí ólímge ákeluí múmkín.