Qazaqstan Respublıkasynyń Prezıdentí janyndaǵy Qazaqstannyń strategıyalyq zertteuler ınstıtutynyń (QSZI) tapsyrysy boıynsha 2026 jylǵy sáuír aıynda qoǵamdyq píkírge júrgízílgen saualnama nátıjelerí boıynsha el Prezıdentíne degen sením deńgeıí 86,7% boldy. Atalǵan kórsetkísh sońǵy jyldary tūraqty joǵary deńgeıde saqtalyp, qoǵamnyń eldí jańǵyrtu men júıelí reformalar baǵytyn berík qoldaıtynyn aıǵaqtaıdy, – dep habarlaıdy aqshamnews.kz tílshísí Zertteu ınstıtutyna sílteme jasap.
Prezıdentke degen eń joǵary sením deńgeıí jastar arasynda tírkeldí – 91,4%. Būl úrdís sením sıpatynyń sapalyq erekshelígín kórsetedí. Jas buyn memleket tarpynan ūsynylatyn bílím granttary, túrlí baǵdarlamalar, tsıfrlyq qyzmetter jáne ózge de qoldau tetíkterín jıí paıdalanady. Sonymen qatar búgíngí jastar eldíń qarqyndy damu kezeńínde qalyptasyp keledí, būl jaǵdaı Prezıdentke degen sením deńgeıíne de yqpal etpeı qoımady.
Prezıdentke degen joǵary sením deńgeıí qala tūrǵyndary (86,9%) men auyl halqy (86,7%) arasynda da anyq baıqalady. Degenmen senímníń mán-mazmūny ártúrlí. Auyl tūrǵyndary memleketpen ınfraqūrylymdyq jobalar, áleumettík baǵdarlamalar men tólemder arqyly tíkeleı baılanys ornatsa, qala tūrǵyndarynyń senímí júıelí ózgerísterdí qabyldaumen jáne olardyń nátıjelerín baǵalaumen kóbírek baılanysty.
Erler de, áıelder de Prezıdentke joǵary deńgeıde sením bíldíredí. Soǵan qaramastan, áıelder arasyndaǵy sením deńgeıí erlermen salystyrǵanda 3,8 paıyzǵa joǵary.
Bílím deńgeıí tūrǵysynan júrgízílgen taldau Prezıdentke degen sením kórsetkíshínde eleulí aıyrmashylyqtardy anyqtaǵan joq. Respondentterdíń bílím deńgeıíne qaramastan, būl kórsetkísh tūraqty túrde joǵary deńgeıde saqtaluda.
Zertteu nátıjelerí kórsetkendeı, azamattardyń satyp alu qabíletí artqan saıyn Prezıdentke degen sením deńgeıí de ósedí. Būl ekonomıkalyq jaǵdaıdy oń baǵalau men Memleket basshysynyń júrgízíp otyrǵan sayasatyn qoldau arasyndaǵy ózara baılanysty ańǵartady.
Osylaısha, alynǵan derekter Prezıdentke degen senímníń tūraqty sıpatqa ıe ekenín jáne onyń bílím deńgeıíne táueldí emestígín, qala men auyl tūrǵyndary arasynda aıtarlyqtaı aıyrmashylyq baıqalmaıtynyn, sondaı-aq barlyq jas toptarynda joǵary ekenín kórsetedí. Būl óz kezegínde eldí damytu sayasatyna júıelí qoǵamdyq qoldaudyń bar ekenín aıǵaqtaıdy.
* Áleumettanulyq saualnama QSZI tapsyrysy boıynsha 2026 jylǵy 10 sáuír men 10 mamyr aralyǵynda júrgízíldí. Íríktemelík jıyntyq kólemí – 8 000 respondent. Saualnamaǵa 18 jastan asqan, elímízdíń 17 oblysy men respublıkalyq mańyzy bar 3 qalasynyń – Astana, Almaty jáne Shymkenttíń tūrǵyndary qatysty.