Astanada Counter-Strike 2 boıynsha ótíp jatqan PGL Astana 2026 halyqaralyq turnırí sáttí bastaldy. Barys Arena keshenínde ūıymdastyrylǵan jarystyń alǵashqy oıyn kúníne shamamen 7 myń kórermen jınalyp, elorda tūrǵyndary men qonaqtarynyń úlken qyzyǵushylyǵyn tudyrdy, dep habarlaıdy qala ákímdígíníń resmı saıty, – dep habarlaıdy aqshamnews.kz tílshísí.
Turnırdíń jartylaı fınalyna MOUZ, Team Spirit, Magic jáne Falcons komandalary joldama aldy. Alǵashqy kúnníń ózínde kórermender tartysty kezdesulerdí, áserlí oıyn sátterín jáne ís-sharanyń joǵary deńgeıde ūıymdastyrylǵanyn tamashalady.
Jankúıerlerdíń erekshe nazary qazaqstandyq oıynshylardyń óneríne audy.
Arenada qoldau kórsetu atmosferasy ornap, trıbunalar súıíktí komandalary men kıbersportshylardyń árbír sáttí áreketín qyzu qoldap otyrdy.
Turnır qonaqtarynyń qatarynda Counter-Strike boıynsha álem chempıony Dáuren Qystaubaev, FURIA Esports komandasynyń oıynshysy Danııl Golubenko, strımer Slava Buster, PGL turnırleríníń júrgízushísí James Banks, sondaı-aq álem chempıony Gabrıel Toledo boldy.
«Barys Arena-daǵy atmosfera keremet boldy. Kıbersport tóńíregínde mūndaı úlken qyzyǵushylyqty kópten berí kórmeppín. Trıbunalarda erekshe energıya sezíldí.
Kórermender komandalarǵa qoldau bíldíríp, ūrandap, árbír raundqa shynaıy jankúıer boldy. Osyndaı turnırge qatysa alǵanyma quanyshtymyn», – dedí jankúıerlerdíń bírí.
Ūıymdastyrushylar men sarapshylardyń aıtuynsha, mūndaı turnırlerdí ótkízu oqıǵalyq turızmdí damytuǵa yqpal etíp, Astananyń írí halyqaralyq kıbersport jarystaryn qabyldaıtyn alań retíndegí mártebesín nyǵaıtady. Sheteldík qonaqtar jarystyń joǵary deńgeıde ūıymdastyrylǵanyn, elordanyń zamanauı ınfraqūrylymyn jáne Qazaqstan jastarynyń kıbersportqa qyzyǵushylyǵy artyp kele jatqanyn atap óttí.
Búgín, 16 mamyrda turnır ekínshí oıyn kúníníń matchtarymen jalǵasady. Jankúıerler aldynda myqty komandalardyń jańa kezdesulerí ótedí.