Memleket basshysy "Kítap oqu mádenıetín damytu jáne zerdelí ūlt qalyptastyru jóníndegí sharalar turaly" Jarlyqqa qol qoıdy, – dep habarlaıdy aqshamnews.kz tílshísí.
Adamı kapıtaldy damytu, qoǵamnyń zıyatkerlík jáne mádenı áleuetín nyǵaıtu, bílím beru, tárbıeleu jáne oqu-aǵartu ísíníń negízgí elementí retínde kítap oqu mádenıetín nasıhattau, zerdelí ūlt qalyptastyru, sondaı-aq shyǵarmashyl, jasampaz jáne básekege qabílettí tūlǵany damytu úshín jaǵdaı jasau maqsatynda Prezıdent mádenıet, bílím jáne ınnovatsıya salalaryndaǵy memlekettík sayasattyń basym baǵyttaryn aıqyndaudy qauly ettí:
kítap oqu mádenıetín damytu jáne zerdelí ūlt qalyptastyru;
oqyrmandarǵa arnalǵan zamanauı ınfraqūrylymdy damytu: tsıfrlyq qūraldardy keńínen qoldana otyryp, jańa formattaǵy kítaphanalar, qoǵamdyq keńístíkter qūru;
tuyndylary jas ūrpaqty Qazaqstan Respublıkasy Konstıtutsıyasynyń negízgí qaǵıdattary men erejelerín qūrmetteu ruhynda tárbıeleuge yqpal etíp júrgen otandyq jazushylar men aqyndardy qoldau;
baspagerler men kítap ónímín taratushylardyń memleket úshín paıdaly qyzmetterín yntalandyru;
ūlttyq ádebı mūrany el íshínde jáne shetelde nasıhattau.
Jarlyqty íske asyru úshín Qazaqstan Úkímetíne bírqatar tapsyrma beríldí. Olardyń qatarynda — jańa formattaǵy kítaphanalar, kópfunktsıonaldy qoǵamdyq keńístíkter qūrudy, zamanauı aqparattyq júıeler men servıster endírudí qosa alǵanda, oqyrman ınfraqūrylymyn jańǵyrtudy qamtamasyz etu bar. Sonymen qatar, 2027 jylǵy 1 qańtarǵa deıínMınıstrler kabınetí mynalardy oryndauy tıís:
"Kítaphana jáne kítap shyǵaru ísí turaly" jańa zań jobasyn ázírleu;
kítap oqu mádenıetín damytudaǵy jetístíkterí úshín Ūlttyq syılyq taǵaıyndau;
bíryńǵaı qoljetímdí Ūlttyq tsıfrlyq kítaphana platformasyn qūru.
Jarlyq qol qoıylǵan kúnínen bastap qoldanysqa engízíledí.