Qazaqstandyq tennısshí Elena Rybakına álemdík reıtıng boıynsha Tokıo Olımpıadasyna qatysu qūqyǵyn jeńíp aldy. Ūlttyq olımpıadalyq komıtettíń resmı saıtyna bergen sūqbatynda Elena aldaǵy josparlary turaly aıtyp berdí.
«Olımpıadaǵa qatysatynym úshín óte quanyshtymyn. Álemdegí eń írí sporttyq jarystardyń bírínde el namysyn qorǵaıtynym – úlken abyroı. Alda «Úlken Dulyǵa» sanatyndaǵy Uımbldon turnırí kútíp tūrǵandyqtan, emotsıyany tejeuge tura keledí. Ázírge osy jarysta sáttí óner kórsetudí maqsat etíp otyrmyn. Reıtıng boıynsha Olımpıadaǵa qatysatyndar qataryna enetínímdí bíldím. Qazír jyl basyndaǵy jaǵdaıǵa qaraǵanda ózímdí jaqsy sezíníp júrmín. Al Tokıo turaly boljam aıtu qıyn. Óıtkení, talaptary múlde bólek jáne ystyq, alysqa ūshuǵa tura keledí. Karantındík sharalar da barlyq qatysushylar úshín qıynǵa soǵady. Barlyǵy meníń Uımbldondaǵy qanshalyqty alysqa baratynyma baılanysty», - deıdí Rybakına.
Tokıo Olımpıadasyna qatysatyn sportshylar 2021 jyldyń 7 mausymyndaǵy ATR jáne WTA reıtıngíne saı jasaqtaldy.
