Vetnamda Qazaqstan azamaty joǵalyp kettí. Qyz 6 nauryzdan keıín baılanysqa shyqpaı qalǵan, – dep habarlaıdy aqshamnews.kz tílshísí.
Joǵalǵan qyzdyń ápkesí áleumettík jelílerde úndeu jarıyalady. Onyń aıtuynsha, 26 jastaǵy Ásem Qazaqstan konsulymen kezdesu úshín Hanoıǵa ūshudy josparlaǵan. Alaıda áuejaıdan shamamen 20 shaqyrym jerde baılanysqa shyqpaı qalǵan.
Tuystarynyń aıtuynsha, joǵalar aldynda Ásem qatty qoryqqan jáne bíreuler ózín ańdyp júrgenín aıtqan.
Ásemníń otbasy Vetnamda nemese kórshí elderde júrgen barlyq adamnan, sondaı-aq, sol jaqta tūratyn tanystary men tuystarynan ízdeuge kómektesudí sūraıdy. Ásírese WhatsApp pen Telegram jelíleríndegí turıstík jáne jergílíktí qauymdastyqtarǵa nazar audarudy ótínedí.
"Eger Vetnamda tuystaryńyz nemese dostaryńyz bolsa, bízben baılanysqa shyqsańyzdar. Sondaı-aq, múmkín bolsa, polıtsıya men auruhanalarǵa habarlasyp kórseńízder", - dep jazdy joǵalǵan qyzdyń ápkesí.
Qazaqstan SÍM ne deıdí?
Vedomstvonyń málímetínshe, qazaqstandyq dıplomattar qyzdy ízdeu jūmysyna qazírdíń ózínde qosylǵan.
«Qazaqstannyń Vetnamdaǵy elshílígí Áubákír Ásemníń tuystarymen baılanysta jáne Vetnamnyń qūzyrly organdarymen bírlesíp jūmys ístep jatyr. Qazír onyń júrgen jerín anyqtau jūmystary júrgízílude. Būl jaǵdaı QR SÍM baqylauynda», – dep habarlady mınıstrlík.
Qyzdy ízdeu jūmystary jalǵasyp jatyr. Tuystary aqparattyń keń taraluy onyń júrgen jerín tezírek anyqtauǵa kómektesedí dep úmíttenedí. Eger kímde-kím Ásem Áubákír turaly qandaı da bír málímettí bílse, jaqyndary ony dereu qūqyq qorǵau organdaryna nemese Qazaqstannyń dıplomatıyalyq ókíldíkteríne habarlaudy sūraıdy.
