Qazaqstannyń respýblıkalyq mańyzy bar avtojoldarynda ótken jedel-profılaktıkalyq sharalar kezinde jalǵan, jasyrylǵan, oqylmaıtyn nemese durys ornatylmaǵan memlekettik nómiri bar 900-ge jýyq kólik anyqtaldy, dep habarlaıdy Aqshamnews.kz tilshisi.
Memlekettik nómir – kóliktiń mindetti sáıkestendirý belgisi. Ol kez kelgen ýaqytta anyq kórinip, ońaı oqylýǵa tıis. Júrgizýshi nómirdiń taza bolýyn jáne durys bekitilýin qadaǵalaýǵa mindetti. Al nómirsiz júrý, nómirdi qoldan jasaý nemese ózgertý, sondaı-aq ony oqýǵa kedergi keltiretin qurylǵylardy paıdalaný jol erejesi men zań talaptaryn buzýǵa jatady.
Shara polısıa, kólik prokýratýrasy jáne «QazAvtoJol» UK» AQ fılıaldarymen birlesip uıymdastyrylǵan. Maqsat – jol qaýipsizdigin arttyryp, quqyqbuzýshylyqtyń aldyn alý.
2026 jylǵy 1 qańtardan bastap 1 AEK mólsheri 4 325 teńge. ÁQBtK-niń 590-baby boıynsha:
-
nómiri oqylmaıtyn ne durys ornatylmaǵan jaǵdaıda – 5 AEK (21 625 tg);
-
nómirsiz nemese tirkelmegen kólikpen júrý – 10 AEK (43 250 tg);
-
bir jyl ishinde qaıtalansa – 20 AEK (86 500 tg) nemese 1 jylǵa júrgizýshi kýáliginen aıyrý;
-
qoldan jasalǵan nómir ornatý – 15 AEK (64 875 tg);
-
jalǵan nómirmen nemese tanýǵa kedergi keltiretin qurylǵymen júrý – 5 táýlikke deıin ákimshilik qamaý jáne 1 jylǵa quqyqtan aıyrý qarastyrylǵan.
Mamandar júrgizýshilerge jolǵa shyǵar aldynda nómirdiń tazalyǵyn tekserip, berik bekitilgenine kóz jetkizýge keńes beredi.