Ál-Farabı atyndaǵy Qazaq ūlttyq unıversıtetínde Respublıka kúníne arnalǵan saltanatty sharalar óttí, – dep habarlaıdy aqshamnews.kz tílshísí.
Mereke ayasynda dástúrlí «Altyn kúz» kreatıvtí jáne ınnovatsıyalyq ıdeyalar jármeńkesí ūıymdastyrylyp, qoldanylǵan lıtıı-ıondy akkumulyatorlardy qaıta óńdeıtín pılottyq tseh íske qosyldy. Sondaı-aq «Taza Qazaqstan» ekologıyalyq aktsıyasy óttí.
Merekelík kúnníń basty jańalyqtarynyń bírí – unıversıtette qoldanylǵan lıtıı-ıondy akkumulyatorlardy qaıta óńdeıtín pılottyq tsehtyń ashyluy. Jańa óndírístík alańda akkumulyatorlardy qauípsíz qaıta óńdeu jáne olardyń qūramynan baǵaly metaldar men paıdaly materıaldardy bólíp alu tehnologıyalary synaqtan ótkízíledí.
Baǵdarlamalyq-nysanaly qarjylandyru ayasynda júzege asyrylyp jatqan ǵylymı jobanyń saltanatty ashylu rásímíne unıversıtet basshylyǵy, otandyq ǵalymdar, sheteldík meımandar, professor-oqytushylar qūramy men studentter qatysty.
Jıynda QazŪU-dyń Basqarma múshesí – akademıyalyq máseleler jóníndegí prorektory Alına Galeeva ǵylymı zertteulerdí órístetu men ekologıyalyq tehnologıyalardy óndíríske engízudíń mańyzdylyǵyn atap óttí.
«Mūndaı jobalar ǵylym men óndírís arasyndaǵy baılanysty nyǵaıtyp, otandyq ǵalymdardyń qoldanbaly zertteuler júrgízuíne jańa múmkíndíkter ashady. Sonymen bírge ekologıyalyq máselelerdí sheshuge baǵyttalǵan būl bastama tūraqty damu qaǵıdattaryn júzege asyruda erekshe mańyzǵa ıe», – dedí prorektor.
Tseh jetekshísí Fyodor Malchıktíń aıtuynsha, protsess barysynda akkumulyatorlar aldymen qauípsíz túrde quatsyzdandyrylyp, ūsaqtalady jáne jekelegen komponentterge bólínedí. Kelushílerge óndíríste qoldanylatyn Fante 400 qos bílíktí shrederí, DZSF-515 díríldeuísh eleuíshí jáne NG-706 sūryptau qūrylǵysy tanystyryldy.
Ekologıyalyq baǵyttaǵy būl bastama «Taza Qazaqstan» respublıkalyq aktsıyasymen ūshtasty. Mereke ayasynda unıversıtet ǵalymdary, oqytushylary men studentterí oqu ǵımarattary men jataqhanalar mańyna 30 qaraǵaı men 35 bórtegúl kóshetín otyrǵyzdy.
QazŪU qalashyǵy jasyl jelekke baı aumaqtardyń bírí sanalady. 2021 jyldan berí mūnda 3 000-nan astam aǵash egílgen. Onyń íshínde 2 300 qaraǵaı, 250 shyrsha jáne 250 jemís aǵashy bar.
Sonymen qatar kítaphana alańynda dástúrlí «Altyn kúz» jármeńkesí ótíp, jas ǵalymdar men studentterdíń AIQaz-Media, KazNU Ilearn, Zhurek AI jáne AlfaBrain ınnovatsıyalyq jobalary kópshílík nazaryna ūsynyldy. Al «Oqıtyn ūlt» jobasy ayasynda «Adal Kitap», «Alash Book», «Almanah», «Daryn», «Jogary Bilim», «Lantar books» jáne «Qazaq unıversıtetí» baspalarynyń kórmesí ūıymdastyryldy.
Sharaǵa Darhan Radio medıaplatformasy qatysyp, jıylǵandardy arnaıy syılyqtar ūtysyna shaqyrdy. Qonaqtar «Jas sheber» startabynyń toqyma būıymdary men zergerlík áshekeıleríne qyzyǵushylyq tanytyp, studentterdíń Respublıka kúníne arnalǵan túrlí-tústí kórkem tuyndylaryn aralady. Ūlttyq sport alańynda ótken qazaq kúresí, asyq atu, arqan tartu jáne toǵyzqūmalaq jarystarynda studentter men qonaqtar baqtaryn synady.
Kelushílerge 1000 kelí palau, 500 kelí bauyrsaq, «Zamran» susyny ūsynylyp, túrík dástúrí boıynsha qūm ústínde daıyndalǵan hosh ıístí kofe taratyldy. Sondaı-aq agrobıostantsıyada ósírílgen ekologıyalyq taza jemís-jıdekter men kókóníster satylymǵa shyǵaryldy.
Baǵdarlama barysynda studentterdíń qaıyrymdylyq bastamasyna erekshe mańyz beríldí. «Jármeńkege arnap bálíshter men salattardy ózímíz daıyndadyq. Jınalǵan qarajatqa tūrmysy tómen otbasylarǵa azyq-túlík satyp alyp, taratudy kózdep otyrmyz», – dedí «Ashyq júrek» studenttík ūıymynyń múshesí Aıjan Tórehan.
Merekelík sharalar saltanatty kontsertpen túıíndeldí. Ol unıversıtet ūjymy men studentterín shyǵarmashylyq, ūlttyq dástúr jáne qorshaǵan ortaǵa qamqorlyq ruhynda bír arnaǵa toǵystyrdy.
Ál-Farabı atyndaǵy QazŪU-dyń Baspasóz qyzmetí