Almatyda jastar táulíktíń kez kelgen uaqytynda bílím alyp, jobasymen aınalysyp, kontent jasap, píkírles jandarmen tanysa alatyn jańa keńístík paıda bolady, – dep habarlaıdy aqshamnews.kz tílshísí.
Bostandyq audanynda jastarǵa arnalǵan alǵashqy táulík boıy jūmys ísteıtín komyunıtı ortalyq ashyldy. Būl qalalyq ınfraqūrylymdy táulík boıy qoljetímdí etuge baǵyttalǵan «Ūıyqtamaıtyn qala» tūjyrymdamasyn júzege asyru jolyndaǵy naqty qadamdardyń bírí.
Būǵan deıín Qazaqstan Prezıdentí Qasym-Jomart Toqaev Almatyny táulík boıy tírshílígí toqtamaıtyn qala retínde damytu míndetín aıqyndaǵan bolatyn. Memleket basshysy megapolıstí tūrǵyndar, bıznes ókílderí men jastar úshín jańa múmkíndíkter ūsynatyn, táulík boıy jūmys ísteıtín tartymdy ortalyq retínde damytuǵa erekshe nazar audardy.
Almaty ákímí Darhan Satybaldy zamanauı qalalyq ınfraqūrylymdy damytuǵa, jastar úshín qolaıly jaǵdaı jasauǵa jáne olardyń ózín-ózí júzege asyru múmkíndíkterín keńeıtuge aıryqsha kóńíl bólíp keledí. Qala sayasatynyń basym baǵyttarynyń bírí jastar jańa bílím alyp, kásíbı daǵdysyn damytyp, bastamalaryn júzege asyryp, píkírles jandardy taba alatyn qoljetímdí qoǵamdyq keńístíkter qalyptastyru. Táulík boıy jūmys ísteıtín komyunıtı ortalyqtyń ashyluy osy baǵyttaǵy taǵy bír mańyzdy qadam bolmaq. Būl jastarǵa megapolıs múmkíndíkterín táulíktíń kez kelgen uaqytynda paıdalanuǵa jol ashady.
«Táulík boıy jūmys ísteuge negízdelgen jańa tásíl endí jastar ınfraqūrylymynda da jalǵasyn tabuda. Óıtkení qazírgí ómír yrǵaǵy áldeqashan tańǵy toǵyzdan keshkí altyǵa deıíngí qalypty jūmys kestesímen shektelmeıdí. Studentter túnde emtıhanǵa daıyndalady, jas kásípkerler sabaqtan keıín startap jobalarymen aınalysady, al shyǵarmashylyq mamandyq ıelerí kóbíne shabytty tún ortasynan keıín tabady. Jańa komyunıtı ortalyq dál osyndaı jastar úshín uaqyt ıdeyasyn damytuǵa jáne júzege asyruǵa kedergí bolmaıtyn orynǵa aınaluǵa tıís», – dedí Jastar sayasaty basqarmasynyń basshysy Azız Kajdenbek.
Ortalyq Rozybakıev kóshesí, 247/7 mekenjaıynda ornalasqan. Jalpy aumaǵy 450 sharshy metr bolatyn úsh qabatta bílím beru, mansaptyq damu, tsıfrlyq tehnologıya, shyǵarmashylyq jáne qoǵamdyq baǵyttar bíríktírílgen. Keńístíktíń basty erekshelíkteríníń bírí ıdeyadan bastap ony ís júzínde júzege asyruǵa deıíngí barlyq kezeńnen bír jerde ótuge múmkíndík boluynda.
Mysaly, bolashaq mamandyǵyn álí tańdamaǵan jastar kásíbı baǵdar boıynsha keńes ala alady. Al jūmys ízdep júrgenderge túıíndeme ázírleuge, sūhbattasuǵa daıyndaluǵa jáne bos jūmys oryndaryn tabuǵa kómektesedí. Qalalyq mansap ortalyǵynda jūmys berushílermen tíkeleı baılanys ornatuǵa múmkíndík qarastyrylǵan. Ashylu rásímíne qatysqan seríktester qatarynda HeadHunter, Alatau City Bank, JETI Group, Attractor School jáne basqa da ūıymdar bar.
Tehnologıyalarǵa qyzyǵatyn jastar úshín Game Dev Zone aımaǵy jūmys ísteıdí. Mūnda kompyuterlík oıyndar ázírleu, baǵdarlamalau, vırtualdy keńístíkter qūru jáne tsıfrlyq dızaın baǵyttarymen tanysuǵa bolady. Aldaǵy uaqytta būl alańda tájírıbelík sabaqtar, hakatondar men komandalyq jobalar ūıymdastyru josparlanyp otyr.
Shyǵarmashylyq ındustrıyalarǵa da erekshe kóńíl bólíngen. Ortalyqta podkast jazuǵa arnalǵan studıya men Media Room jabdyqtalǵan. Mūnda jastar sūhbat jazyp, beınerolıkter túsíríp, áleumettík jelílerge arnalǵan materıaldar ázírlep, jeke brendín damytyp, kásíbı portfolıosyn qalyptastyra alady.
Taǵy bír mańyzdy baǵyt – psıhologıyalyq qoldau. Jastar mamannan jeke keńes alyp, ózderín tolǵandyratyn máselelerdí, ózín-ózí tanu men kásíbı damu baǵytyndaǵy máselelerdí talqylaı alady.
Ortalyqta ashyq dáríster men píkírtalastar ótkízuge arnalǵan amfıteatr, sabaq oqyp, bírlesíp jūmys ísteuge arnalǵan kovorkıng jáne beıresmı kezdesulerge, áńgímelesuge, jańa jobalardy talqylauǵa arnalǵan Kitchen Room keńístígí de bar.
Ūıymdastyrushylardyń josparyna sáıkes, atalǵan baǵyttardyń barlyǵy bírtūtas júıe retínde jūmys ísteuge tıís. Osylaısha, jastar bír jerde bílím alyp, komandasyn qūryp, qajettí daǵdy meńgeríp, jūmysqa ornalasu nemese jeke kásíbín bastau jolyndaǵy alǵashqy qadamyn jasaı alady.
«Jastarǵa arnalǵan táulík boıy jūmys ísteıtín keńístíktíń ashyluy Almatyny damytudaǵy auqymdy kózqarasty kórsetedí. «Ūıyqtamaıtyn qala» tūjyrymdamasy megapolıstíń ómír súru yrǵaǵy ártúrlí tūrǵyndar úshín qoljetímdí árí jaıly boluyn kózdeıdí. Bílím alu, jūmys ísteu jáne ózín-ózí júzege asyru múmkíndíkterí tek táulík uaqytyna táueldí bolmauǵa tıís. Būl rette jańa ortalyqtyń basty míndetí – jastarǵa kezdesuge nemese bílím aluǵa arnalǵan oryn ūsynu ǵana emes, jańa bastamalardyń, kásíbı múmkíndíkter men bírlesken jobalardyń paıda boluyna jaǵdaı jasau», – dedí Azız Kajdenbek.
Kóptegen unıversıtet, kolledj, bílím beru jáne shyǵarmashylyq ūıym shoǵyrlanǵan Almatyda mūndaı format studentter, eńbek jolyn endí bastaǵan mamandar, kásípkerler men kreatıvtí ındustrıya ókílderí úshín sūranysqa ıe alańǵa aınaluy múmkín. Negízgí ıdeya qarapaıym: eger jastyń bílím aluǵa, jańa dúnıe jasauǵa jáne damuǵa degen yntasy bolsa, típtí, jarym túnde de qala oǵan osyndaı múmkíndík ūsynuǵa tıís.