Internet keńístígínde radıkaldy dínı aǵymdardyń úgít-nasıhaty kúsheıíp otyr. Būl turaly teolog, Almaty qalasy Dín ísterí basqarmasynyń janyndaǵy Keńes beru jáne ońaltu ortalyǵynyń dırektory Ruslan Qaıyrgeldí málímdedí.
Mamannyń aıtuynsha, ekstremıstík toptar áleumettík jelíler men túrlí onlaın platformalarda jabyq qauymdastyqtar qūryp, ásírese jastardy nysanaǵa alady. Būǵan dínı sauattylyqtyń tómendígí men áleumettík máseleler áser etedí.
«Búgínde ınternet – baqylauy qıyn orta. Radıkaldy ıdeyalar ashyq árí jasyryn túrde taralady. Sondyqtan saq bolu qajet», – deıdí sarapshy.
Sonymen bírge ol Qazaqstan Jahandyq terrorızm ındeksínde 100-orynda ekenín atap óttí. Būl eldegí terrorıstík qauíptíń tómen deńgeıín kórsetedí. Degenmen aqparattyq keńístíktegí úgít-nasıhat báseńdegen joq.
Aldyn alu úshín ne ísteu kerek?
Sarapshynyń píkírínshe, eń aldymen halyqtyń dínı sauattylyǵyn arttyru qajet. Mektepter men joǵary oqu oryndarynda díntanu baǵytyndaǵy aǵartushylyq jūmystar kúsheıtíluí tıís. Sonymen qatar otbasy ınstıtutyn nyǵaıtu mańyzdy, óıtkení ajyrasu deńgeıíníń joǵary boluy da jastardyń osaldyǵyn arttyrady.
Sondaı-aq ınternettegí mazmūnǵa tūraqty monıtorıng júrgízíp, radıkaldy materıaldardy būǵattau qajet. Būǵan qosa, sapaly balama kontent — podkasttar, aqparattyq saıttar, teologtardyń qatysuymen ashyq dıalog alańdaryn damytu ūsynylady.
Manıpulyatsıya tásílderí
Radıkaldy aǵym ókílderí adamdardy tartu úshín emotsıyalyq qysym, qorqynysh pen kíná sezímín paıdalanady. Keıde «shyndyqtyń jalǵyz kózí» retínde ózderín tanystyryp, jyldam sheshím nemese materıaldyq ıgílík uáde etedí. Keıbírí adamnyń jeke ómírín, qarjysyn baqylauǵa deıín barady.
Maman azamattardy kúmándí, jabyq toptardan aulaq boluǵa, synı oılaudy damytuǵa shaqyrady. Dínı sūraqtar tuyndasa, tek resmı árí bílíktí teologtar men ımamdarǵa júgíngen dūrys.
«Adam shynaıy jauap ízdese, ony kúmándí jelílerden emes, bílímdí mamandardan tabuy kerek», – deıdí Ruslan Qaıyrgeldí.
Materıal Almaty qalasy boıynsha TQK apparatynyń aqparaty negízínde daıyndaldy.
