Oǵan qosa, «sary» mártebesi bar azamattar da qurbandyq shalý oryndaryna kirgizilmeıdi.
Bıyl qurbandyq shalatyn arnaıy oryndarda ASHYQ mobıldi qosymshasy iske qosylady, dep habarlaıdy Almaty-akshamy.kz.
Bul týraly habarlaǵan QMDB tóraǵasynyń orynbasary, naıb múftı Ershat Ońǵardyń aıtýynsha, eń basty talap – maldyń sharıǵat talaptaryna sáıkes baýyzdap, soıylýyn qatań qadaǵalaý.
«Sary» jáne «jasyl» aımaqtaǵy qurbandyq shalatyn arnaıy oryndarda azamattardyń densaýlyǵyna erekshe kóńil bólý jáne qoǵamdyq qaýipsizdikti qamtamasyz etý maqsatynda Ashyq mobıldi qosymshasy iske qosylady. Atap aıtqanda, «qyzyl» jáne «sary» mártebesi bar azamattar qurbandyq shalý oryndaryna jiberilmeıdi, «kók», «jasyl» mártebesi bar azamattar ǵana jiberiledi», - dedi Ershat Ońǵar.
Osy rette, Nur-Sultan, Almaty jáne Shymkent qalalary, oblystardyń ákimdikteri İshki ister, densaýlyq saqtaý mınıstrlikteri, QMDB-men birlesip, elimizdiń óńirlerinde Ashyq mobıldi qosymshasy aıasynda qoǵamdyq qaýipsizdikti qamtamasyz etedi.
«Qasaphanaǵa maska taǵyp, araqashyqtyq saqtap, dene qyzýy bar adamdardyń jaqyndaýyna jol bermeýge tıispiz. Jasy 65-ten asqan qarıalar, áıelder men balalardyń barynsha qurban malyn shalatyn oryndarǵa barýyn shekteýge shaqyramyz. Qazirgi ýaqytta qasaphanaǵa qoıylatyn tártip joǵary. Ony udaıy baqylap, kelýshilermen aradaǵy baılanysqa jiti mán berýimiz kerek. Eń bastysy, maldyń sharıǵat talaptaryna sáıkes baýyzdap, soıylýyn qatań qadaǵalaý qajet», - dedi Ershat Ońǵar.
Aıta keteıik, 2021 jyly qurban shalý rásimi eki jolmen júzege asyrylady. «Sary» jáne «jasyl» aımaqtarda onlaın jáne oflaın formatta ótse, «qyzyl» aımaqtarda pandemıa jaǵdaıynda sharıǵattaǵy «ókildik» qaǵıdasyna sáıkes, qurban2021.kz saıty arqyly tek onlaın rejımde qurban shalynady.