TikTok, Instagram Reels, YouTube Shorts sıyaqty platformalar bízdíń kontent tūtynu daǵdymyzdy túbegeılí ózgertíp úlgerdí. Olar kóńíl kóteredí, aqparat beredí, jarnama men sayasatqa da yqpal etedí. Alaıda jańa zertteuler sheksíz skrollıngtíń mıǵa eleulí áser etetínín kórsetíp otyr, dep habarlaıdy Aqshamnews tílshísí.
Zertteu ne kórsettí?
Avstralıyadaǵy Grıffıt unıversıtetíníń ǵalymdary 71 ǵylymı maqalanyń negízínde 100 myńǵa juyq adamnyń derekterín taldap, qysqa vıdeolardyń kognıtıvtí funktsıyalar men psıhıkalyq densaulyqqa áserín zerttegen.
Ǵalymdardyń aıtuynsha, qysqa rolıkterdí jıí qarau mı qyzmetíníń tómendeuíne, zeıínníń nasharlauyna jáne reaktsıyany baqylau qabíletíníń álsíreuíne ákeluí múmkín. Būl jasóspírímderge de, eresekterge de qatysty.
Zertteu Grouvs pen Tompsonnyń «úırenu jáne sezímtaldyqtyń qos teorıyasyna» negízdelgen.
Ǵalymdar mynadaı qorytyndy jasaǵan:
- jyldam, qysqa rolıkter táueldílík tudyruy múmkín, sonyń saldarynan mı tynysh, ūzaq uaqyt talap etetín áreketterge — kítap oqu, tapsyrma oryndau sıyaqty — auysudy qıyn qabyldaıdy;
- kontenttí íríkteıtín algorıtmder ımpulsıvtílíktí arttyryp, lezde lázzat aluǵa ūmtylysty kúsheıtedí;
- qysqa vıdeolardy shamadan tys qarau áleumettík oqshaulanuǵa, ómírge qanaǵattanudyń tómendeuíne, ūıqynyń būzyluyna jáne mazasyzdyqtyń kúsheyuíne ákeluí múmkín.
Zertteushílerdíń aıtuynsha, mūndaı áser barlyq jas toptarynda baıqalady, yaǵnı qysqa vıdeolardy kóp kóretín adamdardyń nazaryn shoǵyrlandyruy aıtarlyqtaı nasharlaıdy.
Aldaǵy jospar
Ǵalymdar qysqa vıdeolarǵa táueldílíktí baǵalaıtyn arnaıy shkala jasaǵan. Būl bolashaq zertteuler úshín paıdaly qūral bolmaq.
Avtorlardyń aıtuynsha, qysqa vıdeolardyń tanymaldyǵy artyp kele jatqandyqtan, olardyń kognıtıvtí funktsıyalar men mínez-qūlyqqa áserín tereńírek zertteu qajet.