Aqordada Prezıdent Qasym-Jomart Toqaevtyń tóraǵalyǵymen Digital Qazaqstan jobasynyń júzege asyryluy jónínde jūmys keńesí óttí, – dep habarlaıdy aqshamnews.kz tílshísí Aqordaǵa sílteme jasap.
Qasym-Jomart Toqaev memlekettík qūrylymdar jasandy ıntellekt jáne tsıfrlandyru jyly ayasynda auqymdy jūmys ísteuí qajet ekeníne nazar audardy. Negízgí maqsat – ozyq tehnologıya men jasandy ıntellektíní el ómíríníń ár salasyna jappaı engízu.
– Eń aldymen, qolaıly ınstıtutsıonaldyq, qūqyqtyq jáne ískerlík orta qalyptastyru qajet. Qazaqstan – yńǵaıly jáne ozyq tsıfrlyq retteu júıesín engízgen elderdíń qatarynda. Bíz būl jūmysty alǵashqylardyń bírí bolyp bastadyq. Atap aıtqanda, elímízde Tsıfrlyq kodeks qabyldandy. Jasandy ıntellekt turaly arnaıy zań kúshíne endí. Bíraq būl tek auqymdy jūmystyń basy ǵana, mūnymen toqtap qalmauymyz kerek. Álemde bolyp jatqan ózgerísterdíń qarqyny óte joǵary. Ony jaqsy bílesízder. Ǵylym, bílím, tehnologıya asa joǵary jyldamdyqpen damyp jatyr. Sondyqtan normatıvtík qūjattardy da der kezínde jańartyp otyru kerek. Bír sózben, qazírgí zamanda árbír azamatqa túsíníktí jáne aıqyn bolatyn «Tsıfrlyq memleket» ūǵymyn qalyptastyru qajet, yaǵnı Digital Qazaqstan strategıyasy azamattar men bıznestíń naqty talap-tílegín eskeruge tıís, – dedí Memleket basshysy.