DSM qūtyruǵa baılanysty saqtyq sharalaryn eske saldy, – dep habarlaıdy aqshamnews.kz tílshísí.
Byltyr qūtyrudan Qazaqstanda úsh adam qaıtys bolǵan. Osyǵan baılanysty Densaulyq saqtau mınıstrlígí qazaqstandyqtarǵa úndeu jasap, saqtyq sharalaryn eske saldy.
DSM Telegram-daǵy arnasynda jarıyalanǵan málímetke súıensek, qūtyru auruynyń halyq arasynda taraluy búkíl álemde ózektí másele bolyp qalyp otyr, sebebí būl dert ortalyq nerv júıesín auyr zaqymdap, ólímge ákeledí. Qūtyru 150-den astam elde kezdesedí, jyl saıyn álemde 55 myńnan astam adam osy aurudan kóz jūmady.
2025 jyly respublıka boıynsha qūtyrudan úsh adam qaıtys bolǵan. Januarlardyń tísteuí, tyrnauy jáne sílekeıí saldarynan medıtsınalyq kómekke 60 153 adam, osy jyldyń Í toqsanynda 14 134 adam júgíngen. Barlyǵyna kómek kórsetílgen.
"Qūtyrumen kúrestíń negízgí sharasy – dereu qūtyruǵa qarsy vaktsınatsıyalau kursynan ótu jáne tístelgen, tyrnalǵan nemese sílekeı tıgen jerdí 20 paıyz sabyndy erítíndímen molynan juu", - delíngen habarlamada.
DSM qūtyrudyń aldyn alu úshín mynadaı qauípsízdík sharalaryn ūsynady:
jabaıy januarlarmen baılanysqa túspeu, óıtkení sau jabaıy januarlar ádette adamnan qashqaqtaıdy;
úı januarlaryna qūtyruǵa qarsy profılaktıkalyq ekpelerdí míndettí túrde jasau;
úı januarynyń mínezí ózgerse, basqa januardan jaraqat alsa nemese sebepsíz ólse, míndettí túrde veterınar mamanǵa júgíníp, baqylau ornatu nemese ólím sebebín anyqtau;
eger januarmen (syrttaı sau kórínse de) baılanys bolǵan jaǵdaıda, tūrǵylyqty jerdegí travmatologıyalyq punktke dereu júgíníp, jarany óńdetu jáne vaktsınatsıyalau kursynan ótu qajet. Vaktsınatsıyalau tegín júrgízíledí. Jarany sharuashylyq sabyndy molynan qoldana otyryp óńdeu;
taǵaıyndalǵan emnen esh jaǵdaıda bas tartpau jáne óz betínshe toqtatpau qajet, sebebí būl qaıǵyly saldarǵa ákeluí múmkín.
"Qūtyrudy emdeıtín dárí joq. Auru januar tístegen adam úshín qūtyruǵa qarsy vaktsına – ómírdí saqtap qaludyń jalǵyz múmkíndígí. Sondyqtan vaktsınatsıyalaudy dereu júrgízu qajet.
Arnaıy emníń (qūtyruǵa qarsy vaktsına jáne ımmunoglobulın alu) tıímdílígí tístegennen keıín medıtsınalyq kómekke júgínu uaqytyna tíkeleı baılanysty ekenín este ūstau qajet", - dep eskertedí DSM ókílderí.