Bostandyq audanynyń ákímdígí men Óńírlík kommunıkatsıyalar qyzmetíníń mamandary Almatyda ardagerge arnaıy baryp, maıdangerdí qūttyqtady, – dep habarlaıdy aqshamnews.kz tílshísí.
Qala bılígí qatary kún sanap sırep bara jatqan ardagerlerdí elep-eskeríp, árqaısysyn únemí uaqyt tauyp qūtyqtap qaıtuǵa tyrysady. Qazír sol kezde áskerge attanǵan eń jas ardagerdíń ózí júzge kelíp otyr.
Ūly Otan soǵysynyń ardagerí Anatolıı Nazarovıch Popov bıyl 100 jasqa toldy. Ol mekteptí bítíre salysymen bírden maıdanǵa attanypty. Ekínshí Baltyq maıdanynyń qūramynda baılanys rotasynda qyzmet etíp, Baltyq elderín azat etuge atsalysqan eken. Ardager álí tyń kóríndí.
Anatolıı Nazarovıch «Rıga qalasyn azat etkení úshín», «Germanıyany jeńgení úshín» medalymen, sondaı-aq mereıtoılyq nagradamen marapattalǵan.
Qyzy Natalya Kosolapovanyń aıtuynsha, jauda jeńgennen keıín basshylyq jas sarbazǵa oquyn jalǵastyrudy ūsynypty. Sóıtíp, medıtsına salasyndaǵy ómír jolyn bastaǵan. Saratov áskerı-medıtsınalyq uchılıshchesín bítírgen soń, 40 jyldan astam uaqyt boıy Almaty qalasynyń (būrynǵy Sovet, qazírgí Almaly) audanynda feldsher bolyp eńbek etíptí.
Ardagerdíń qyzy, kúıeu balasy, tórt nemeresí men jetí shóberesí bar. Osylardyń arqasynda kárílíktíń qalaı kelgenín de sezbeı qalǵanyn aıtty.
Natalya Anatolevna mūndaı qamqorlyqqa alǵys bíldírdí.
«Ákímdíktegílerdíń, eríktíler men jurnalısterdíń óstíp kóńíl bólíp, kelíp qaıtqanyna kóp raqmet. Būl soǵys kórgen, qan keshken ūrpaq qoı. Bíz olarǵa qaryzdarmyz. Ózderíníń de qatary kún sanap azaıyp barady..», — deıdí ol.
Mūndaı kezdesu ótkenge qūrmet qana emes, beıbít ómírdí baǵalaı bíluge shaqyru. Bíz ótkennen sabaq alyp, osy beıbít ómírdíń qadírín bíluímíz kerek.