Qalada mamyr aıynyń basynan bastap subūrqaqtar kezeń-kezeńímen íske qosylyp, 1 qazanǵa deıín kún saıyn saǵat 08:00-den 23:00-ge deıín jūmys ísteıdí, – dep habarlaıdy aqshamnews.kz tílshísí.
Aua raıyna baılanysty olardyń jūmysy retteledí: temperatura +5°C-tan tómendegen jaǵdaıda subūrqaqtar uaqytsha toqtatylady.
Qalalyq Qoǵamdyq keńístíkterdí damytu basqarmasy ókílderíníń málímetínshe, bıyl 55 kommunaldyq subūrqaq keshenín íske qosu josparlanyp otyr, onyń íshínde 11 «qūrǵaq» subūrqaq bar. Barlyq nysannyń tehnıkalyq jáne sanıtarlyq jaǵdaıy tıístí qyzmetterdíń tūraqty baqylauynda bolady.
Mausymǵa daıyndyq jūmystary aldyn ala júrgízíldí. Mamandar subūrqaqtardyń tostaǵanyn jáne aınalasyndaǵy aumaqtardy tazalap, sudy zalalsyzdandyrdy, jabdyqtardy jóndep, syrlap, ınjenerlík júıelerge tolyq tekserís jasady. Būl olardyń mausym boıy senímdí árí qauípsíz jūmys ísteuín qamtamasyz etedí.
Sonymen qatar qaladaǵy negízgí subūrqaqtardy jańǵyrtu jobalary da qatar júzege asyryluda. Respublıka alańy men Ǵabıt Músírepov atyndaǵy Qazaq memlekettík akademıyalyq balalar men jasóspírímder teatry mańyndaǵy subūrqaqtar qaıta jańartylyp jatyr. Qazírgí tańda būl jūmys ayaqtalyp keledí. Jobalardy tolyq ayaqtau jáne írgeles aumaqtardy kórkeıtu 2026 jyly úshínshí toqsanǵa josparlanǵan.
Jańartylǵan subūrqaqtar tūrǵyndar úshín jaıly árí qauípsíz demalys oryndaryna aınalyp, zamanauı qoǵamdyq keńístíkterdíń ajyramas bólígí bolmaq. Būl qalalyq ortany jaqsartu men qoǵamdyq keńístíkter sapasyn arttyruǵa baǵyttalǵan júıelí jūmystyń jalǵasy.