Jyly mezgíl bastalysymen kene shaǵu qaupí artady. Kene - kene entsefalıtí sıyaqty qauíptí jūqpany taratatyn jándík, – dep habarlaıdy aqshamnews.kz tílshísí.
№36 qalalyq emhananyń dáríger-ınfektsıonısí Qaıdarbek Mereı mūndaıda uaqyttyń ár mınuty qymbat ekenín aıtady.
Kene shaqqannan keıín alǵashqy 96 saǵat íshínde dárígerge qaralu qajet. Dál osy kezeńde kenege qarsy ımmunoglobulın engízu tıímdí, ol aurudyń damu qaupín tómendetedí.
Almaty qalasy Qoǵamdyq densaulyq saqtau basqarmasynyń málímetíne sáıkes, shūǵyl kómek - kenení alu, ımmunoglobulın engízu - qalalyq auruhanalardyń jaraqat punkterínde kórsetíledí.
Almaly jáne Bostandyq audandarynyń tūrǵyndary Jandosov kóshesí, 6 mekenjaıy boıynsha ornalasqan Ortalyq qalalyq klınıkalyq auruhanaǵa júgíne alady.
Túrksíb jáne Jetísu audandary úshín kómek Papanın kóshesí, 220 mekenjaıy boıynsha №4 qalalyq klınıkalyq auruhanada kórsetíledí.
Áuezov, Alatau jáne Nauryzbaı audandarynyń tūrǵyndaryn Qalqaman shaǵynaudany, 20 mekenjaıyndaǵy №7 qalalyq klınıkalyq auruhana qabyldaıdy.
Medeu audanynyń tūrǵyndary Qazybek bı kóshesí, 96 mekenjaıyndaǵy Qadalyq jedel shūǵyl kómek kórsetu auruhanasyna júgínuí kerek.
14 jasqa deıíngí balalarǵa kómek tūrǵylyqty jeríne qaramastan Manas kóshesí, 40 mekenjaıyndaǵy Balalar shūǵyl medıtsınalyq kómek kórsetu ortalyǵynda kórsetíledí.
Eger kene qaladan tys jerde shaqsa jáne bírden dárígerge júgínu múmkíndígí bolmasa, alǵashqy kómektí dūrys kórsetu mańyzdy.
Kenení pıntsetpen ne jíppen teríge barynsha jaqyn jerínen ūstap, asyqpaı, aınaldyra otyryp shyǵaru kerek. Odan keıín shaqqan oryndy antıseptıkpen óńdeu qajet. Múmkíndík bolsa, kenení keıín zertteu úshín íshíne dymqyl maqta salynǵan taza ydysqa salyp saqtaǵan jón. Mamandar kenení alu kezínde maı nemese spırt qoldanuǵa keńes bermeıdí - būl ınfektsıyanyń qanǵa túsu qaupín arttyrady.
Kenení ózíńíz alyp tastaǵannyń ózínde dárígerge qaraludy keıínge qaldyruǵa bolmaıdy. Qauíp deńgeıín tek maman baǵalap, qajet bolsa ımmunoglobulın engízedí.
Aldyn aludyń eń tıímdí joly - kene entsefalıtíne qarsy ekpe saldyru. Ekpe emhanada jáne jekemenshík medıtsınalyq ortalyqtarda jasalady. Vaktsınalau 1-3 aı aralyǵymen ekí kezeńnen tūrady, keıín 5 aıdan 1 jylǵa deıín qaıta egíledí. Ekpení mausym bastalǵanǵa deıín, yaǵnı kúzde ne qysta alǵan dūrys, sonda ımmunıtet uaqytynda qalyptasady.
Mańyzdy: kene shaqqannan keıín josparly vaktsına qorǵamaıdy. Mūndaı jaǵdaıda shūǵyl aldyn alu qajet. Dárígerler kene shaǵuyn elemeıge, der kezínde medıtsınalyq kómekke júgínuge shaqyrady. Būl auyr asqynulardyń aldyn alady.