Almatyda «Táuelsízdík ūrpaqtary» jobasy ayasynda JAS GALA studenttík kóktem festıvalí bastaldy. Joba Almaty qalasy Jastar sayasaty basqarmasynyń qoldauymen júzege asyrylyp, ony Almaty studentterí alyansy ūıymdastyrǵan, – dep habarlaıdy aqshamnews.kz tílshísí.
Búgínde baıqauǵa 26 joǵary oqu ornynyń studentterí qatysyp jatyr. Qazírgí tańda 3 myńnan astam ótíním kelíp túsken. Ótíním 10 sáuírge deıín qabyldanady, al qatysushylardyń jalpy sany shamamen 3 500 adamǵa jetpek.
Ūıymdastyrushylardyń aıtuynsha, bıyl íríkteu kezeńí jańa formatta óttí. Baıqauǵa qatysushylardy íríkteu studentterge qolaıly bolu úshín kúz mezgílínde bír aı boıy kún saıyn júrgízílgen. Būǵan deıín ótínímderdí bír jyl būryn tapsyru qajet bolatyn, al qabyldau úderísí ūzaqqa sozylyp, aıyna orta eseppen 100-150 ótíním ǵana qaralatyn. Sonymen qatar, būl ózgerís studentterdíń oqu barysyna kedergí keltírmeu maqsatynda engízíldí. Óıtkení būryn keıbír jastar aldyn ala ótíním bergenímen, kelesí jyly oquyn ayaqtap ketíp, festıvalge qatysa almaı qalatyn. Al bírínshí kurs studentterí kerísínshe uaqytynda ótíním bere almaı, íríkteuden tys qalyp jatatyn.
Bıylǵy festıvaldíń taǵy bír erekshelígí — mobılografıya baǵytynyń keńeyuí. Endí qatysushylar jasandy ıntellekt tehnologıyasyn paıdalana otyryp, shyǵarmashylyq jūmystaryn ūsyna alady. Sondaı-aq festıval bıyl aıtuly mereıtoılarǵa oraılastyrylyp otyr. Atap aıtqanda, ol Ermek Serkebaevtyń 100 jyldyǵy men Jambyl Jabaevtyń 180 jyldyǵyna arnalady.
2026 jyldan bastap baıqauǵa tek joǵary oqu oryndarynyń studentterí qatysady. Mūndaı sheshím ótken jylǵy nátıjelerge, qatysushylardyń daıyndyq deńgeıíne, sondaı-aq qazylar alqasynyń ūsynystary men qoǵamdyq talqylaularǵa súıene otyryp qabyldanǵan.
Joba ayasynda jastardyń shyǵarmashylyq jáne tūlǵalyq damuyna baǵyttalǵan qosymsha ís-sharalar da josparlanǵan. Olardyń qatarynda jeńímpazdar men sala mamandarynyń qatysuymen ótetín sheberlík sabaqtary, motıvatsıyalyq kezdesuler jáne qatysushylardyń shyǵarmashylyq jūmystaryn aqparattyq qoldau bar.
Almaty qalasy Jastar sayasaty basqarmasy basshysynyń orynbasary Mıras Nysanalıevtíń aıtuynsha, jastar — kez kelgen memlekettíń damuy men básekege qabílettílígín aıqyndaıtyn negízgí resurs. Búgíngí basty míndet — jastardyń ózín-ózí júzege asyruyna jáne jan-jaqty damuyna jaǵdaı jasau. JAS GALA sekíldí jobalar jastar men olardyń tabysty bolashaǵy arasyndaǵy mańyzdy kópírge aınalyp keledí.
Festıval bes baǵytty qamtıdy: vokal, horeografıya, mobılografıya, teatr jáne aspapta oınau. Baıqau ekí kezeńnen tūrady: joǵary oqu oryndary íshíndegí íríkteu jáne qalalyq kezeń.