Almaty tabıǵı aımaqtardy órtten qorǵau úshín jańa sheshímderdí qoldanysqa engíze bastady. Beınemonıtorıng júıelerí, drondar men basqa da arnauly qūraldar tauly aımaqtarda shyqqan tútíndí jyldam anyqtauǵa múmkíndík beredí.
Óńírlík kommunıkatsıyalar qyzmetínde Almaty qalasy Tótenshe jaǵdaılar departamentí Memlekettík órt baqylauy basqarmasynyń bastyǵy Konstantın Kanın osylaı dep málímdedí.
Qala íshínde orman alqaby bolmaǵanymen, Almaty qalasynda órt qaupí artqanda erekshe nazar audarudy talap etetín erekshe qorǵalatyn tabıǵı aumaqtar ornalasqan. Būl – 20 805 gektar Íle-Alatau ūlttyq tabıǵı parkí, 708,2 gektar «Medeu» tabıǵı parkí men 137,7 gektar Baum toǵaıy.
Jyl basynan berí qala aumaǵynda qūrǵaq shóp tūtanǵan 341 oqıǵa tírkelíp, onyń jalpy alańy 34,3 gektarǵa jetken. Mausymdyq kún raıyn eskere otyryp, qalalyq jáne respublıkalyq qyzmetter tabıǵı órttíń aldyn alyp, qauíp-qaterdí barynsha azaıtu úshín keshendí ís-sharalar júrgíze bastady.
«Monıtorıng júrgízíp, jedel áreket etu úshín DJI Air 2S jáne DJI Matrice 300 sıyaqty tórt dron qoldanylady. Sonymen qatar, qala ákímdígíníń qoldauymen «Medeu» tabıǵı parkíníń aumaǵynda ortalyqtandyrylǵan beınemonıtorıng júıesí engízíldí. Būl júıede optıkalyq-sensorlyq qūrylǵylar men úsh jylu kamerasy bar, olar Shymbūlak, Medeu men Butakovka (Shybyndysaı) shatqalynyń aumaǵynda ornatylǵan», - dep atap óttí Konstantın Kanın.
Órt qaupín azaıtu maqsatynda Tótenshe jaǵdaılar departamentí men qala ákímdígí 237 gektar aumaqtaǵy qūrǵaq ósímdíkterdí otap, 104 shaqyrym mıneraldanǵan jolaqtar jasady, olar tūrǵyn úı aumaqtarymen shektesedí.
«Sonymen qatar aqparattyq jūmys pen saqshylyq ta qosa júrgízílíp jatyr. Qorshaǵan ortany qorǵau jáne orman sharuashylyǵy mekemesíníń ókílderímen bírge 90 reıd jasadyq, órt qauípsízdígí erejelerí turaly 7000-nan astam eskertpe taratyldy, ashyq jerge ot jaqqan 19 oqıǵa anyqtalyp, 17 azamat ákímshílík jauapkershílíkke tartylyp, aıyppūldyń jalpy kólemí 3 mıllıon teńgeden asyp tústí», - dep atap óttí Konstantın Kanın.
Almatynyń tabıǵı aumaqtarynyń qauípsízdígín qamtamasyz etu úshín órtke qarsy bíríktírílgen top jūmys ísteıdí: kún saıyn 13 adam men ekí tehnıka kezekshílíkte bolady. Qajet bolǵan jaǵdaıda jeke qūramnan 100 adamǵa deıín qosymsha kúsh taǵy tartylady. Sondaı-aq qyzmette 1000-nan astam órt sóndíru qūraly bar, onyń íshínde arqalyq órt sóndírgíshter, shóp shabatyn qūraldar men orman órtterín sóndíruge arnalǵan qūrylǵylar bar. Almaty qalasynyń 20 órt sóndíru bólímshesí de órt qauípsízdígín bírge baqylaıdy.
«Órt qauípsízdígíne dayarlyq – bízdíń ortaq míndetímíz ekenín atap ótkím keledí. Sondyqtan qala tūrǵyndary men qonaqtary tauly jáne ormandy aımaqtarda barynsha abaı boluy kerek. Ot jaǵyp, mangaldy ońdy-soldy paıdalanbańyzdar, síríńke men temekí tūqyldaryn tastamańyzdar, qoqysty, ásírese áınek pen plastıktí qaldyrmańyzdar, qūrǵaq shóptí órtemeńízder. Osy bír qarapaıym erejelerdí saqtau arqyly sízder tabıǵatty saqtap, tynyshtyqty qamtamasyz etuge sep bolasyzdar», - dedí Konstantın Kanın.