Qūny 35 mlrd teńgení qūraıtyn būl kásíporyn elímízdegí alǵashqy árí Ortalyq Azıyadaǵy júgeríní tereń óńdep, joǵary qosylǵan qūny bar óním shyǵaratyn eń írí keshen bolmaq, – dep habarlaıdy aqshamnews.kz tílshísí.

Túrkístan oblysynda «Qazkrahmal» zauytynyń qūrylysy jalǵasuda.

Joba óńdeu ónerkásíbín damytuǵa jáne óńír ekonomıkasyn ártaraptandyruǵa baǵyttalǵan. Ekí kezeńdí qamtıtyn jobanyń alǵashqysynda astyqty qabyldau, keptíru jáne saqtau úshín bazalyq ınfraqūrylym qūryldy. Qazírgí uaqytta paıdalanuǵa berílgen. Ekínshí kezeń barysynda tereń óńdeu óndírístík kesheníníń qūrylysy qarqyndy júrgízílude.

Zauyt tolyq íske qosylǵannan keıín jylyna 150 myń tonnaǵa deıín júgerí óńdep, 26 túrlí óním shyǵaratyn bolady. Olardyń qatarynda taǵamdyq glyukoza, maltozaly shárbat, júgerí maıy, krahmal jáne qūrama jem bar. Óndírís qaldyqsyz tsıkl qaǵıdaty boıynsha ūıymdastyrylyp, tek GMO-syz tabıǵı shıkízat qoldanylady.

Basty maqsat – tūraqty shıkízat bazasyn qalyptastyru. Osyǵan baılanysty óńírde júgerí egís alqaptaryn ūlǵaıtu jūmystary júrgízílude. Jańa alqaptar Túrkístan oblysynyń Shardara, Jetísaı jáne Maqtaaral audandarynda ıgerílude.

Kásíporynnyń tehnologıyalyq jaraqtandyryluy 80% deńgeıínde avtomattandyrylǵan, būl óním sapasyn joǵary deńgeıde baqylauǵa, óndírístík shyǵyndardy azaıtuǵa jáne tauarlardyń básekege qabílettílígín arttyruǵa múmkíndík beredí. Joba ayasynda ozyq halyqaralyq tehnologıyalar engízílíp, sheteldík mamandardyń tájírıbesí eskerílude.

Zauyt ónímderí Qazaqstannyń íshkí naryǵyna, sonyń íshínde taǵam jáne farmatsevtıka ónerkásíbíne baǵyttalady, sondaı-aq Azıya men Europa elderíne eksportqa shyǵarylady. Júgerí krahmaly, shárbattar jáne basqa da ónímder túrlí ónerkásíp salalarynda keńínen qoldanylady, būl kásíporynnyń eksporttyq áleuet kúsheıtedí.

Bolashaqta zauyt quatyn jylyna 300 myń tonnaǵa deıín arttyru jáne álemníń 100-den astam kompanıyasymen halyqaralyq áríptestíktí tereńdetu josparlanuda.