«Jolaýshylar tasymaly» AQ men «Shtadler Qazaqstan» JSHS kompanıasy el ishinde paıdalanýǵa beriletin jańa úlgidegi plaskart vagonynyń alǵashqy sýretterin usyndy, dep habarlaıdy
Rail-news.kz málimetine saı, zamanaýı vagondar Qazaqstannyń klımattyq erekshelikterin, uzaq baǵyttardyń júktemesin jáne halyqaralyq standarttardy eskere otyryp jasalǵan.
Plaskart vagondary 58 jolaýshyǵa arnalǵan. Jańa jobalaý sheshimderiniń arqasynda vagonnyń ishki keńistigi tıimdi uıymdastyryldy. Kireberis bóliginde júk qoıýǵa arnalǵan sóreler bar, al jolserikke bólek demalys aımaǵy, shaǵyn asúı jáne basqarý bólimi qarastyrylǵan.
Joǵarǵy oryndarǵa shyǵýǵa arnalǵan jańa úlgidegi baspaldaq ornatylǵan. Úshinshi deńgeıde jolaýshylardyń zattaryn salýǵa arnalǵan keń bagaj sóreleri ornalastyrylǵan. Ár oryn jeke shammen, 220V rozetkasymen, USB jáne USB-C porttarymen jabdyqtalǵan. Tómengi oryndardyń astynda eki bagajdy qoıýǵa arnalǵan arnaıy oryn bar. Al ortalyq ústel 200 kg-ǵa deıingi salmaqty kótere alady.
Alǵashqy otandyq Stadler vagondary 2026 jyldan bastap kelesi baǵyttarda júretin bolady:
• № 3/4 «Astana — Almaty»
• № 353/354 «Astana — Semeı»
• № 85/86 «Astana — Shymkent»
• № 47/48 «Astana — Atyraý»
Jyl sońyna deıin jańa vagondardyń alǵashqy legi «Jolaýshylar tasymaly» AQ-ǵa beriledi. Kelisim aıasynda Stadler kompanıasy óndirilgen vagondarǵa 20 jyl boıy servıs qyzmetin kórsetedi. Jalpy jospar boıynsha 2030 jylǵa deıin 557 vagon paıdalanýǵa beriledi.