Mūnda bír uaqytta 500 adamǵa deıín demala alady, dep habarlaıdy aqshamnews.kz tílshísí.
Memleket basshysy jaıly qalalyq ortany qalyptastyruǵa, zamanauı ınfraqūrylymdy damytuǵa jáne azamattardyń sapaly demalysyn qamtamasyz etuge únemí nazar audaryp keledí.
Búgín Qostanaıda elímízdegí eń írí jabyq akvapark ashyldy. Saltanatty sharaǵa qatysqan oblys ákímí Qūmar Aqsaqalov zamanauı keshenníń ashyluy – tūrǵyndardyń otbasymen bírge demalyp, uaqytyn qyzyqty ótkízuge jasalǵan ıgí qadam ekenín aıtty.
Akvaparktíń jalpy aumaǵy ekí esege juyq ūlǵaıyp, 9 myń sharshy metrden asty, al su aıdynynyń kólemí úsh eseden astam artyp, 1 myń sharshy metrden asty.
Mūnda bír uaqytta 500 adamǵa deıín demala alady. Akvaparkte bes basseın, jetí su syrǵanaǵy, onyń íshínde úlken syrǵanaq, balalar aımaǵy, tolqyndy basseın, djakuzı jáne fud-kort bar.
«Aımaǵymyzda sporttyq jáne qoǵamdyq ınfraqūrylym qarqyndy damyp keledí. Sońǵy 3 jylda 30-dan astam sport nysany ashyldy. Qostanaıda Ústel tennısí ortalyǵynyń jáne Trıatlon-parktegí kópfunktsıonaldy stadıonnyń qūrylysy ayaqtaluǵa jaqyn. «Astana» shaǵyn audanynda Sport saraıy, «Bereke» shaǵyn audanynda jáne Trıatlon-park mańynda 2 fıtnes-ortalyq salynady. Jekpe-jek saraıy men erekshe qajettílíkterí bar jandarǵa arnalǵan sport keshenín salu josparlanǵan», – dedí aımaq basshysy.
2022 jyldan berí 21 myńnan astam aǵash otyrǵyzyldy. Jyl saıyn 1 mln-nan astam gúl egíledí. Ótken jyly 5 sayabaq pen skver ashyldy.
Qala mańynda ekopark qūryluda. «Bereke» shaǵyn audanynda jańa sayabaq salu josparda. Kórkemsuret galereyasy, jańa sauda-oıyn-sauyq jáne qonaqúı keshenderí boı kóteredí.
«Mūndaı oryndar kóbírek boluy kerek. Mūnyń barlyǵy tūrǵyndarǵa jaıly orta qalyptastyruǵa baǵyttalǵan. Basty maqsat – jastardyń Qostanaıda qalyp, eńbek etíp, otbasyn qūryp, bolashaǵyn osy jerde kóruíne jaǵdaı jasau», – dedí Qostanaı oblysynyń ákímí.