1 mamyr — Qazaqstan halqynyń bírlígí kúní Almaty halyqaralyq áuejaıynda sheteldík qonaqtardy qarsy alu erekshe formatta ūıymdastyryldy. Qalaǵa taban tíregen sátten-aq turısterge ūlttyq naqyshtaǵy estelík syılyqtar ūsynylyp, qazaqy qonaqjaılylyqtyń aıryqsha úlgísí kórsetíldí, – dep habarlaıdy aqshamnews.kz tílshísí.
Būl ıgí bastama Almaty qalasynyń Turızm basqarmasy, halyqaralyq áuejaı, Shekara qyzmetí men keden organdarynyń bírlesuímen júzege asty. «Halyqaralyq qonaqtarǵa arnalǵan qarsy alu syılyǵy» atty joba árbír meımanǵa degen shynaıy qūrmet pen íltıpattyń belgísíne aınaldy.
Osy kúní Almatymen tanysu dástúrlí turıstík baǵyttardan būryn áserden bastau aldy. Jyly júzben qarsy alu, aq peıíl men merekelík kóńíl kúı Bírlík kúníníń negízgí mazmūnyn — tatulyq, beıbítshílík jáne mádenı ártúrlílíktí aıqyn sezdírdí.
Sońǵy jyldary Almatyǵa degen qyzyǵushylyq aıtarlyqtaı artyp keledí. 2025 jyldyń qorytyndysy boıynsha qalaǵa 754 myń sheteldík turıst kelse, bıyl būl kórsetkísh 800 myńnan aspaq. Būl Almatynyń óńírdegí jetekshí turıstík ortalyqtardyń bírí retíndegí mártebesín nyǵaıta túsedí.
Turızm basqarmasy ókílderíníń aıtuynsha, mūndaı jobalar qala turaly alǵashqy oń áser qalyptastyruǵa baǵyttalǵan júıelí jūmystyń mańyzdy bólígí bolyp otyr. Almaty ózín ashyq, zamanauı árí qonaqjaı shahar retínde tanytyp keledí.