Ramazan aıynda muqtaj azamattarǵa jappaı aqshalaı kómek kórsetiledi degen áleýmettik jelilerde taraǵan aqparat shyndyqqa sáıkes kelmeıdi, dep habarlaıdy Aqshamnews.kz tilshisi.
Qazaqstan musylmandary dinı basqarmasynyń «Zeket jáne qaıyrymdylyq» qorynyń dırektory Maqsatbek Qaıyrǵalıev mundaı habarlamalarǵa senbeýge shaqyrdy. Onyń aıtýynsha, QMDB atynan júzege asatyn barlyq qaıyrymdylyq sharalary tek resmı saıttar men resmı paraqshalarda ǵana jarıalanady.
Qor basshysy jelide tarap jatqan onlaın tirkeý arqyly kómek berý týraly málimetterdiń negizsiz ekenin atap ótti. Sebebi qor tarapynan mundaı tájirıbe eshqashan qoldanylmaǵan.
«Muqtaj azamattar kómek alý úshin qor ókilderine tikeleı kelip, jazbasha ótinish beredi. Ótinishke áleýmettik jaǵdaıyn rastaıtyn qujattar qosa tapsyrylady. Barlyq ótinish komısıada qaralyp, sheshim qabyldanǵan soń ǵana kómek kórsetiledi. Ramazan aıynda saıt arqyly tirkelý degen bizde joq», – dedi Maqsatbek Qaıyrǵalıev.
Sondaı-aq QMDB Ramazan aıynda halyqqa negizinen rýhanı jáne áleýmettik qoldaý kórsetýge basymdyq beredi. Atap aıtqanda, aýyzashar uıymdastyrý, balalarǵa ramazan táttilerin taratý, muqtaj otbasylarǵa azyq-túlik sebetterin úlestirý dástúrli túrde júzege asady. Al aqshalaı kómek barlyq óńirde birdeı kórsetile bermeıdi jáne jappaı sıpatqa ıe emes.
Qor dırektory keıbir aımaqtarda demeýshiler tabylǵan jaǵdaıda, olar naqty muqtaj otbasylarmen baılanystyrylatynyn aıtty. Degenmen QMDB tarapynan keń kólemde aqshalaı kómek kórsetý úshin ótinish qabyldaý nemese onlaın tirkeý júrgizilmeıdi.
Osyǵan baılanysty QMDB ókilderi azamattardy jalǵan aqparatqa aldanbaı, tek resmı derekkózderge senýge jáne kúmándi habarlamalardan saq bolýǵa shaqyrdy.