Búgínde Qazaq ūlttyq unıversıtetínde 30 myńǵa juyq student bílím alady, dep habarlaıdy aqshamnews.kz tílshísí.
Ál-Farabı atyndaǵy Qazaq ūlttyq unıversıtetíníń Basqarma Tóraǵasy – Rektor Janseıít Túımebaev jańa oqu jylynyń bastaluyna oraı studenttermen kezdesu ótkízdí.
Júzdesude Memleket basshysy Qasym-Jomart Toqaevtyń jasandy ıntellektíní damytu, tsıfrlyq tehnologıyalardy keńínen engízu jáne Qazaqstandy zamanauı tsıfrlyq memleketke aınaldyru baǵytynda bergen tapsyrmasy ayasynda QazŪU-da atqarylǵan jūmystardyń nátıjesín tanystyryp, aldaǵy josparymen bólístí. Sondaı-aq joldaudaǵy jastarǵa arnalǵan tapsyrmalardyń oryndaluy jónínde aqparat berdí.
Ís-sharaǵa bírínshí kurs studentterí, «Altyn belgí» ıegerlerí, halyqaralyq olımpıadalar men jarystardyń jeńímpazdary, qoǵamdyq sharalarǵa belsendí aralasyp júrgen jastar qatysty. Búgínde qara shańyraq Qazaq ūlttyq unıversıtetínde 30 myńǵa juyq student bílím alady. 2026-2027 jańa oqu jylynda oqu orny qūramyna barlyǵy 8117 bílím alushy qosyldy. Olardyń qatarynda 674 «Altyn belgí» ıegerí men respublıkalyq jáne halyqaralyq jarystardyń jeńímpazdary bar.
Unıversıtet basshysy bílím alushy jastardy jańa oqu jylynyń bastaluymen qūttyqtady. Janseıít Túımebaev óz sózínde qazírgí kezeńde joǵary bílím beru júıesíníń aldynda jańa míndetter tūrǵanyn atap óttí.
«Bíz úshín eń basty qūndylyq – student. Sondyqtan tsıfrlyq ózgeríster eń aldymen jastardyń sapaly bílím aluyna, ǵylymı ízdenísíne jáne kásíbı damuyna qyzmet etuí kerek. QazŪU studentterí elímízdíń tsıfrlyq ekonomıkasyn qalyptastyratyn jańa buyn mamandary boluy tıís», – dedí rektor.
Kezdesude jastardyń azamattyq jauapkershílígí men qoǵamdyq mádenıetí de nazardan tys qalmady. Rektor qazírgí kezeńde zań men tártíptí saqtau, qoǵamdyq ortadaǵy ádep normalaryn ūstanu, úlkenge qūrmet, kíshíge ízet kórsetu árbír studenttíń kúndelíktí ómír saltyna aınaluy tıís ekenín jetkízdí.
Sonymen qatar unıversıtet basshysy studentterdí salauatty ómír saltyn ūstanuǵa, dūrys tamaqtanuǵa, sportpen tūraqty aınalysuǵa jáne zıyandy ádetterden aulaq boluǵa shaqyrdy. Unıversıtet aumaǵynyń tazalyǵy men jasyl jelektí saqtau da árbír jastyń ortaq jauapkershílígí ekení aıtyldy.
Būǵan qosymsha, kítap oqu mádenıetín qalyptastyru men jastardyń ıntellektualdyq deńgeıín arttyru máselesíne de erekshe mán beríldí. Janseıít Qanseıítūly Memleket basshysy ūsynǵan ūlttyq ádebıettíń tańdauly shyǵarmalaryn oqudyń mańyzyna toqtalyp, studentter arasynda kítap oquǵa degen qyzyǵushylyqty arttyru qajettígín aıtty.
Júzdesu sońynda Janseıít Túımebaev studentterdíń jańa ıdeyalary men bastamalary unıversıtettíń nyǵayuyna mańyzdy ról atqaratynyn atap ótíp, jastardy ǵylymǵa, ınnovatsıyaǵa jáne eldíń tsıfrlyq damuyna belsendí úles qosuǵa úndedí.