Alekseı Lutsenko Aıtı–Nagoyada (Japonıya) ótíp jatqan XX jazǵy Azıya oıyndarynyń alǵashqy jarys kúnínde Qazaqstan qūramasynyń ekínshí altyn medalín jeńíp aldy, – dep habarlaıdy aqshamnews.kz tílshísí.
Qazaqstan ūlttyq qūramasynyń ókílí erler arasyndaǵy tasjol velosportynan jekeleı uaqytqa jarysta jeńímpaz atandy.
Alekseı Lutsenko úshín būl — mansabyndaǵy tórtínshí Azıya oıyndary, al qūrlyqtyń basty dodasynda jeńíp alǵan besínshí altyn medalí.
Jarys nátıjelerí:
1-oryn Alekseı Lutsenko — 41:24.05
2-oryn Shunsuke Imamura — 42:58.04
3-oryn Saınbayar Djambalyamts — 42:58.06
Būǵan deıín otandasymyz 2014, 2018 jáne 2023 jyldardaǵy Azıya oıyndarynda da chempıon atanǵan.
Alekseı Lutsenkonyń jekeleı uaqytqa jarystaǵy būǵan deıíngí nátıjelerí:
2014 jyl (42 km) — 50:28.78
2018 jyl (40 km) — 55:37.13
2023 jyl (39,7 km) — 48:05.75
Aıta keteıík, Qazaqstan qūramasy Azıya oıyndaryna alǵash ret qatysqan 1994 jyldan berí jazǵy Azıya oıyndarynyń bes dúrkín chempıony atanǵan sportshy būǵan deıín tek kanoeshí Konstantın Negodyaev bolatyn. Ol būl nátıjege 1994 jáne 1998 jyldardaǵy Azıya oıyndarynda qol jetkízgen.
Alekseı Lutsenko sondaı-aq 2017 jylǵy Azıya chempıony jáne 2012 jylǵy 23 jasqa deıíngí sportshylar arasyndaǵy álem chempıony.
Búgínde tasjol velosporty Qazaqstannyń 9 óńírínde damytylady. Būl sport túrímen júıelí túrde 5,3 myńnan astam adam aınalysady, sportshylardy dayarlau jūmysyn 111 jattyqtyrushy júrgízedí.
Elímízdegí balalar-jasóspírímder sport mektepterí janynan tasjol velosporty boıynsha 22 bólímshe jūmys ísteıdí. Onda 1,9 myńnan astam sportshy dayarlyqtan ótedí. Sonymen qatar sporttaǵy daryndy balalarǵa arnalǵan respublıkalyq jáne óńírlík mektepter men kolledjderde, olımpıadalyq dayarlau jáne olımpıadalyq rezerv ortalyqtarynda sportshylardy daıyndau jūmystary júrgízíledí.
Qazaqstannyń tasjol velosporty boıynsha ūlttyq qūramasynyń sapynda shamamen 120 sportshy bar, onyń 27-sí shtattyq ūlttyq komanda qūramyna kíredí. Qalyptasqan dayarlyq júıesí sport rezervín qalyptastyryp, jasóspírímder, jastar jáne eresekter qūramalary arasyndaǵy sabaqtastyqty qamtamasyz etuge múmkíndík beredí.
Eske salaıyq, XX jazǵy Azıya oıyndary Aıtı–Nagoyada 19 qyrkúıek pen 4 qazan aralyǵynda ótíp jatyr.