Ál-Farabı atyndaǵy Qazaq ūlttyq unıversıtetínde «Qytaı-Qazaqstan ıntellektualdy esepteu jáne jasandy ıntellekt ınnovatsıyalary» taqyrybynda halyqaralyq sımpozıum ūıymdastyryldy, – dep habarlaıdy aqshamnews.kz tílshísí.
QazŪU men Qytaı kompyuter federatsıyasynyń (CCF) bírlesuímen ótken auqymdy sharaǵa otandyq jáne sheteldík ǵylymı qauymdastyq ókílderí, IT-mamandar men halyqaralyq sarapshylar qatysty.
Sımpozıumnyń ashyluynda sóz alǵan QazŪU-dyń Basqarma tóraǵasy – rektor Janseıít Túımebaev būl jıynnyń Memleket basshysy Qasym-Jomart Toqaevtyń Qazaqstandy tsıfrlyq tehnologıyalar men jasandy ıntellektíní keńínen qoldanatyn elge aınaldyru jóníndegí strategıyalyq tapsyrmasyn júzege asyrudaǵy mańyzyna toqtaldy.
«QazŪU men Qytaı kompyuter federatsıyasy arasyndaǵy yntymaqtastyq júıelí túrde damyp keledí. Ótken jyly delegatsıyamyz Harbın qalasyndaǵy Ūlttyq kompyuter kongresíne qatyssa, bıyl sáuír aıynda unıversıtet bazasynda Qytaı kompyuter federatsıyasynyń Almatydaǵy ókíldígí resmı túrde ashyldy. Búgíngí sımpozıum osy jemístí áríptestíktíń zańdy jalǵasy», – dep atap óttí rektor.
Óz kezegínde CCF tóraǵasynyń orynbasary Haı Tszın ekí eldíń ǵylymı-tehnologıyalyq áleuetín joǵary baǵalap, JI tehnologıyalaryn damytuda bírlesken zertteuler júrgízu men jas ǵalymdardy dayarlaudyń ózektílígín tílge tıek ettí.
Jıyn barysynda sarapshylar JI salasyndaǵy sońǵy ǵylymı ázírlemeler men tájírıbelík jobalardy tanystyryp, olardyń ekonomıka men qoǵam damuyna yqpalyn saralady. Ásírese úlken tíldík modelder (LLM), agenttík júıeler jáne JI-dí medıtsına men auyl sharuashylyǵynda qoldanudyń naqty joldary keńínen talqylandy.
Sımpozıum jūmysy sarapshylardyń qatysuymen ótken dóńgelek ústel men arnaıy sektsıyalyq semınarlarmen jalǵasty.