Jańǵyrtylǵan vokzal táulígíne 2 598 jolaushyny qabyldauǵa qauqarly, dep habarlaıdy aqshamnews.kz tílshísí.
Memleket basshysy Qasym-Jomart Kemelūly Toqaevtyń tapsyrmasyna sáıkes jańǵyrtylǵan Aqtóbe qalasynyń temírjol vokzalynyń saltanatty ashylu rásímí óttí.
Būl – óńírdíń kólík-logıstıkalyq ınfraqūrylymyn damytuǵa baǵyttalǵan mańyzdy jobalardyń bírí. Jańǵyrtu jūmystarynyń basty maqsaty – vokzaldyń jaılylyǵy men qauípsízdígín arttyryp, jolaushylarǵa kórsetíletín qyzmet sapasyn jańa deńgeıge kóteru.
Aqtóbe oblysynda barlyǵy 7 temírjol vokzaly jańǵyrtyluda. Būǵan deıín Shalqar qalasy men Shūbarqūdyq auylyndaǵy vokzaldar paıdalanuǵa berílgen-dí. Búgín osy qatarǵa Aqtóbe qalasynyń jańarǵan temírjol vokzaly qosyldy.
Ashylu saltanatynda Aqtóbe oblysy ákímíníń orynbasary Asylbek Esenbaev Prezıdenttíń tapsyrmasymen júzege asyrylyp jatqan jūmystardyń mańyzdylyǵyn atap óttí.
«Memleket basshysy Qasym-Jomart Kemelūlynyń tapsyrmasymen elímízde 124 vokzalǵa jańǵyrtu jūmystary júrgízíldí. Sonyń íshínde Aqtóbe oblysynda 7 vokzal kúrdelí jóndeuden óttí. Búgín jańǵyrtu jūmystarynan keıín Aqtóbe qalasynyń temírjol vokzaly el ıgílígíne berílgelí tūr. Vokzaldyń jalpy kólemí 7,3 myń sharshy metr, táulígíne 6 myńǵa juyq jolaushyǵa qyzmet kórsetedí. Ǵımarat zamanauı jabdyqtarmen qamtamasyz etílíp, jolaushylarǵa barlyq qolaıly jaǵdaılar jasalǵan», – dedí Asylbek Esenbaev.
Jańǵyrtu jūmystary keshendí túrde júrgízíldí.
Jańartylǵan vokzal ǵımaratynyń jalpy audany 7 377,52 sharshy metr. Joba ayasynda ǵımarattyń íshkí úı-jaılary qaıta qūrylyp, qasbetí men shatyry jańartyldy. Sonymen qatar jylytu, jeldetu jáne aua baptau júıelerí tolyq auystyryldy.
Jolaushylar úshín zamanauı kútu zaldary, jańa kíreberís toptary jáne platformalyq shatyrlar jasaldy. Vokzal aumaǵynda beınebaqylau, órt qauípsízdígí jáne qauípsízdíktí baqylaudyń zamanauı júıelerí íske qosyldy.
Ásírese jolaushylardyń barlyq sanatyna qolaıly jaǵdaı jasauǵa basymdyq berílgen. Múmkíndígí shekteulí azamattar úshín qoljetímdí orta qarastyrylyp, nysan zamanauı talaptarǵa sáıkestendíríldí.
Ashylu saltanatyna oblys basshylyǵynyń ókílderímen qatar temírjol salasynyń ardagerlerí men «Qazaqstan temír joly» ūlttyq kompanıyasynyń ókílderí qatysty.
Temírjol salasynyń ardagerí, qūrmettí temírjolshy, tehnıka ǵylymdarynyń kandıdaty Ybyraı Bısalıev óz sózínde temírjol salasynyń qalyptasuy men damuyna toqtalyp, jańa vokzaldyń el ıgílígíne qyzmet etetíníne toqtaldy.
Al «Qazaqstan temír joly» ŪK» AQ Basqarma tóraǵasynyń orynbasary Mūrat Tóregeldın jańǵyrtylǵan nysannyń múmkíndíkterí men temírjol ınfraqūrylymyn damytu baǵytyndaǵy jūmystardy alǵa tartty.
Jańǵyrtylǵan vokzal táulígíne 2 598 jolaushyny qabyldauǵa qauqarly.
Aqtóbeníń basty temírjol qaqpasy jańardy.
Endí qala tūrǵyndary men Aqtóbege keletín qonaqtarǵa zamanauı, jaıly árí qauípsíz orta ūsynylady.
Būl – tek bír ǵımarattyń jańaruy emes, óńírdíń kólík ınfraqūrylymyn jańa deńgeıge kóteruge baǵyttalǵan mańyzdy qadam.