Jańa sort qūrǵaqshylyq pen topyraqtyń tūzdanuyna tózímdí, dep habarlaıdy aqshamnews.kz tílshísí.
Qazaqstandyq ǵalymdar jazdyq dándí arpanyń jańa «Batyrhan» sortyn shyǵardy. Sharuashylyqqa paıdalylyǵy boıynsha júrgízílgen baǵalau nátıjesínde sort oń baǵalanyp, memlekettík sort synaǵyna beríldí. Sonymen qatar selektsıyalyq jetístíkke patent alu jónínde ótíním beríldí.
Jańa sort Qazaqstannyń auyl sharuashylyǵy óndírísíne tán agroklımattyq jáne topyraq jaǵdaılaryn eskere otyryp ázírlengen. «Batyrhan» joǵary árí tūraqty ónímdílígímen, dáníníń írílígímen, jatyp qaluǵa jáne bírqatar aurularǵa tózímdílígímen, sondaı-aq qūrǵaqshylyq pen topyraqtyń tūzdanuyna joǵary tózímdílígímen erekshelenedí.
«Batyrhan» jazdyq damu tıpíne jatady. Onyń vegetatsıyalyq kezeńí 75–85 kúndí qūraıdy. Sort 1000 dánníń joǵary massasymen jáne masaqtaǵy dán sanynyń kóptígímen sıpattalady.
Aurularǵa tózímdílígí boıynsha «Batyrhan» tozańdy jáne qatty qarakúıege tózímdí, al fuzarıozdy tamyr shírígíne álsíz shaldyǵady.
Sorttyń mańyzdy bıologıyalyq erekshelíkteríníń bírí — «túptenu–tútíkke shyǵu» kezeńíníń kemínde 20 kúnge sozyluy. Būl kezeńníń salystyrmaly túrde ūzaq boluy ósímdíktíń jetkílíktí vegetatıvtík massany qalyptastyruyna jáne dánmen jaqsy tolysqan ónímdí masaqtardyń túzíluíne qolaıly jaǵdaı jasaıdy.
«Batyrhan» 58/83-77 × 2/07-4K budandyq populyatsıyasynan jeke sūryptau ádísí arqyly alynǵan.
Sortty ázírleu Y. Jaqaev atyndaǵy Qazaq kúrísh sharuashylyǵy ǵylymı-zertteu ınstıtuty men Ósímdíkter bıologıyasy jáne bıotehnologıyasy ınstıtutynyń bírlesken ǵylymı jūmysynyń nátıjesínde júzege asyryldy.
«Batyrhan» sortynyń memlekettík sort synaǵyna ūsynyluy ony auyl sharuashylyǵy óndírísíne engízu jolyndaǵy mańyzdy kezeń bolyp tabylady. Synaq barysynda sorttyń sharuashylyqqa paıdalylyǵy men agronomıyalyq qūndy belgílerí jan-jaqty baǵalanyp, ony Qazaqstannyń ártúrlí agroekologıyalyq jaǵdaılarynda ósíru perspektıvalary aıqyndalatyn bolady.
Selektsıyalyq jetístíkke patent alu jóníndegí ótínímníń beríluí otandyq selektsıya nátıjesín zıyatkerlík menshík nysany retínde qūqyqtyq qorǵaudyń mańyzdy kezeńderíníń bírí sanalady.